मुख्यमंत्री श्री भूपेश बघेल आज विजयादशमी पर्व के अवसर म राजधानी के ऐतिहासिक रावणभाठा मैदान म आयोजित दशहरा उत्सव म सामिल होइन। उमन रावणभाठा मैदान पहुंचके भगवान श्री राम अऊ लक्ष्मण के पूजा करिन अऊ प्रदेश के खुशहाली के कामना करिन।
मुख्यमंत्री श्री बघेल ह रावणभाठा दशहरा मैदान के विकास बर एक करोड़ रूपिया देहे के घोषणा करिन। ये मौका म उमन सिंगल यूज प्लास्टिक अपशिष्ट ले बने प्लस्टिक रूपी रावण के रिमोट दबाके दहन करिस।
ए अवसर म मुख्यमंत्री ह अपन बचपन ल सुरता करत बताइस कि ओ मन 12 किलोमीटर दूर अपन गांव ले रायपुर के रावणभाठा म बइला गाड़ी ले दशहरा उत्सव देखे आत रहिस। उमन कहिन कि छत्तीसगढ़ के परम्परा रहे हे कि इहां के रहवइया बुराई ल बस्ती ले बाहिर रखथें अऊ सबो अच्छाई मन ल बस्ती के भीतर रखथें अऊ यही कारण हे कि रावणभाठा ल बस्ती ले बाहिर बनाथें अऊ राम चौरा ल बस्ती के भीतर बनाथें।
मुख्यमंत्री ह कहिन कि आज असत्य ऊपर सत्य के विजय के दिन हे। उमन प्रदेश वासी मन ल विजयादशमी पर्व के शुभकामना अऊ बधाई दीन। ये बेरा म सांसद श्री सुनील सोनी, विधायक श्री बृजमोहन अग्रवाल, श्री विकास उपाध्याय, नगर निगम के महापौर श्री प्रमोद दुबे, रावणभाठा आयोजन समिति के अध्यक्ष श्री मनोज वर्मा ह घलोक अपन विचार व्यक्त करिस। रायपुर के रावणभाठा म दशहरा उत्सव 150 बछर ले सरलग मनाए जात हे। ये बेरा म जोन अध्यक्ष श्री सालिक सिंह ठाकुर संग अड़बड़ झन जनप्रतिनिधि अउ बड़ संख्या म जनता सकलाय रहिन।
