रायपुर, कृषि मंत्री श्री रविन्द्र चौबे ह आज रायपुर स्थित कृषि उपज मंडी प्रांगण पंडरी के औचक निरीक्षण करिन अउ अधिकारी मन ल जरूरी दिशा-निर्देश दीन। उमन किसान उपभोक्ता बाजार के निरीक्षण करिन अउ कहिन कि जल्दीच एकर लोकार्पण करे जाही जेकर से किसान मन ल एकर लाभ मिल सकय। उमन लोकार्पण के तियारी के संबंध म जरूरी दिशा-निर्देश अधिकारी मन ल दीन।
उल्लेखनीय हे कि किसान बाजार एक व्यावसायिक अवधारणा हे जेखर उद्देश्य किसान मन ल ऊंखर उत्पाद के ब्रिक्री बर जरूरी सुविधा उपलब्ध कराना हे जेखर से ओ मन अपन कृषि उत्पाद के ब्रिक्री सीधा उपभोक्ता मन ल उचित मूल्य म कर सकयं। किसान मन ल ऊंखर उत्पादन के अच्छा भाव मिलय अऊ उपभोक्ता मन ल उचित दाम म फल अउ साग भाजी मिलै, एखर बर किसान उपभोक्ता बाजार एक अभिनव पहल हे।
उमन मंडी प्रांगण पंडरी के खाली जमीन के अवलोकन करिन अउ उंखर समुचित उपयोग बर लउहे कार्ययोजना बनाके प्रस्तुत करे के निर्देश मंडी बोर्ड के प्रबंध संचालक ल दीन। कृषि मंत्री श्री चौबे ह थोक फल-सब्जी मंडी तुलसी बाराडेरा के अवलोकन करिन। उमन थोक फल सब्जी मंडी के उपयोग के संबंध म सबो संबंधित पक्ष मन ले सबो पहलु मन ऊपर विचार-विमर्श करके अनाज मंडी ल इहां लाये के प्रस्ताव ऊपर विचार करे के बात कहिन।
ए अवसर म मंडी बोर्ड के प्रबंध संचालक श्री अभिनव अग्रवाल, अकतहा प्रबंध संचालक श्री महेंद्र सवन्नी, अपर संचालक श्री के आर बंजारे, अधीक्षण अभियंता श्री कोमरे संग आन विभागीय अधिकारीगण उपस्थित रहिन।
