कृषि मंत्री श्री चौबे ह देखिन बिहान के स्टॉल : समूह के महिला मन के हुनर के करिन तारीफ

रायपुर, 15 फरवरी 2020। कृषि विकास अउ किसान कल्याण अऊ जैव प्रौद्योगिकी मंत्री श्री रविन्द्र चौबे ह आज इहां किसान मेला अउ कृषि प्रदर्शनी कार्यक्रम म मुख्य अतिथि के तौर म सामिल होइन। किसान मेला अउ कृषि प्रदर्शनी के आयोजन रामकृष्ण मिशन आश्रम कोति ले करे गए रहिस। आयोजन आश्रम वाले खेल मैदान म होइस। कार्यक्रम म कृषि अउ विकास मंत्री ह खेल मैदान म लगाए गए कई ठन प्रदर्शनी अऊ स्टाल मन ल देखिन। मंत्री श्री चौबे ह बिहान स्टाल के अवलोकन करिन अऊ समूह के महिला मन ले बातचीत करिन। महिला मन ह बताइन कि ऊंखर कोति ले बनाए गए चीज मन के अच्छा बिक्री होवत हे अऊ ऊंखर करीबन 10 हजार रुपए ले जादा के समान बिके हे। कृषि मंत्री ह ऊंखर मेहनत अऊ हुनर के तारीफ करिन। ये बेरा म बिहान के महिला मन ह कृषि मंत्री ल अपन उत्पाद भेंट करिन। किसान मेला म कृषि, पशुपालन, मत्स्यपालन, उद्यानिकी, क्रेडा, रेशमपालन, कृषि विज्ञान केन्द्र, रामकृष्ण मिशन, महिला अउर बाल विकास आदि विभाग मन कोति ले घलोक प्रदर्शनी लगायी गए रहिस।