दुर्ग, कृषि अउ जलसंसाधन मंत्री श्री रविंद्र चौबे ह आज दुर्ग जिला के धमधा ब्लाक के ग्राम बरहापुर म नवीन धान उपार्जन केंद्र के शुभारंभ करिन। ये बेरा म कृषि मंत्री श्री रविंद्र चौबे ह कहिन कि सरकार किसान मन के हित ल सबले जादा अहमियत देथे। किसान मन के हित अऊ किसान मन के संतोष, सरकार बर सर्वोच्च प्राथमिकता हे। उमन कहिन कि धान खरीदी के सबो सुविधा किसान मन ल मिल सकय, एखर बर धान खरीदी केंद्र मन म बनेच व्यवस्था ठउका करे गए हे अऊ धान खरीदी के मानिटरिंग घलोक करे जात हे।
कृषि मंत्री ह कहिन कि क्षेत्र म सिंचाई के सुविधा बढ़ाए अउ कृषि के विकास बर शासन कृत संकल्पित हे। शासन कोति ले सरलग किसान मन ले गोठ होइस ओखर फीडबैक लेके योजना बनाए जात हे। श्री चौबे ह कहिन कि मोला ये बात के हार्दिक खुशी हे कि बरहापुर म आज हमन धान उपार्जन केंद्र के शुभारंभ करे हवन। बरहापुर के मनखे बहुत दिन ले धान खरीदी केंद्र के मांग करत आए हें। आज ये केंद्र सुरू हो गीस। अब बरहापुर के मनखे मन ल धान बेचे जादा दूरिहा नइ जाना परही। सरकार किसान मन ल जादा ले जादा सुविधा देहे बर संकल्पित हे।
कृषि मंत्री ह कहिन कि मुख्यमंत्री श्री भूपेश बघेल ह पदभार ग्रहण करतेच सबले पहिली किसान मन के करजा माफी करिस अऊ ओखर बाद 2500 रूपिया म धान खरीदी के निर्णय लीस। ये निर्णय ले नवा ऊर्जा के संचार होए हे। किसान आधुनिक खेती कर सकयं, एखर बर बनेच मदद करे जाही। गांव मन के विकास बर हर संभव काम करे जाही।
श्री चौबे ह कहिन कि किसान मन ल धान खरीदी के समय सबो प्रकार के सुविधा मिलत रहय, ये ठउका करे जिलाधिकारी मन ल निर्देश दे गए हे। धान खरीदी केंद्र मन म व्यवस्था ल ठउका करे गए हे। भरोसा हे कि किसान मन ल ये मा कोनो प्रकार के दिक्कत नइ आही। ये मौका म कृषि मंत्री ह किसान मन के धान घलोक तौलिन।