विकास बर जरूरी हे पानी के प्रबंधन: मंत्री श्री रविन्द्र चौबे

रायपुर, छत्तीसगढ़ के जल संसाधन मंत्री श्री रविन्द्र चौबे ह सोमवार के जल संसाधन विभाग म नव नियुक्त सहायक अभियंता मन ल बेहतर काम बर प्रेरित करिन अऊ ओ मन ल शुभकामना दीन। जल संसाधन मंत्री श्री रविन्द्र चौबे, जल संसाधन विभाग के रायपुर ट्रेनिंग सेंटर म नवनियुक्त सहायक अभियंता मन के आधारभूत प्रशिक्षण के उद्घाटन सत्र ल संबोधित करत रहिन। उमन नव नियुक्त अभियंता मन के उत्साहवर्धन करत कहिन कि अवइया समय म जल संसाधन विभाग के जिम्मेदारी आप मन के खांधा म हे अऊ आप मन कुछ अइसन काम करव के अवइया पीढि आप मन ल याद करय।
जल संसाधन मंत्री श्री चौबे ह कहिन कि पानी विकास के आधारभूत जरूरत हे ये विकास के जिम्मेदारी आप मन जइसे अभियंता मन के खांधा म हे। नवनियुक्त सहायक अभियंता मन ल संबोधित करत श्री रविन्द्र चौबे ह कहिन कि आप मन ल बदलत तकनीक के मुताबिक खुद ल घलोक हर दिन अपडेट करत रहना होही ताकि आप मन के क्षमता मन म विस्तार होत रहय। ये प्रशिक्षण सत्र म नवनियुक्त 44 सहायक अभियंता अउ 6 सहायक भू-जलविद मन ल प्रशिक्षण देहे जात हे। 15 दिन तक चलइया आधारभूत प्रशिक्षण सत्र 14 फरवरी ले चालू होके 4 मार्च 2022 तक चलही। ये प्रशिक्षण म कार्यालयीन व्यवस्था, स्थापना, लेखा, प्रशासनिक सेटअप, प्रशासनिक अउ वित्तीय अधिकार अउ तकनीकी विषय जइसे डिजाइन, ड्राइंग, प्राक्कलन, सीएसआर, स्पेसिफिकेशन, गुणवत्ता परीक्षण आदि विषय मन म प्रशिक्षण प्रदान करे जाही अऊ कार्यस्थल के भ्रमण कराए के कार्यक्रम घलोक निरधारित हे।
कार्यक्रम के अध्यक्षता जल संसाधन विभाग के सचिव श्री अन्बलगन पी. ह करिन। उमन प्रशिक्षण सत्र ल संबोधित करत कहिन कि अभियंता मन ल खुद म समय के संग बदलाव करत रहना होही ताकि उमन आगू जाके बड़का जिम्मेदारी उठाए बर तियार रहयं। ये मौका म विभाग के मुख्य अभियंता श्री इंद्र कुमार उइके, महानदी परियोजना के प्रमुख अभियंता श्री आरके नगरिया समेत वरिष्ठ अधिकारी मौजूद रहिन।