- प्रदेश के सबो शासकीय भवन अऊ सार्वजनिक स्थल मन तक पहुंचना होही अब आसान
- ये साल 200 करोड़ रूपिया के लागत के 1116 काम कराए जाही
रायपुर, 19 जून 2020। मुख्यमंत्री श्री भूपेश बघेल ह आज इहां अपन निवास कार्यालय म मुख्यमंत्री सुगम सड़क योजना के शुभारंभ करिन। मुख्यमंत्री सुगम सड़क योजना के माध्यम ले प्रदेश के सबो शासकीय भवन अऊ सार्वजनिक स्थल मन तक पहुंचना अब आसान होही। ये योजना ले प्रदेश भर के अइसन सबो शासकीय शाला, चिकित्सालय, कॉलेज, आंगनबाड़ी भवन, उचित मूल्य के दुकान अऊ आन शैक्षणिक संस्था मन जऊन अभी तक मुख्य मार्ग ले पक्की सड़क ले नइ जुड़े रहिस, ओ सबो ल पक्का अउ बारहमासी मार्ग ले जुड़ही। ये बेरा म गृह अउ लोक निर्माण मंत्री श्री ताम्रध्वज साहू उपस्थित रहिन।
मुख्यमंत्री श्री भूपेश बघेल ह सुगम सड़क योजना के शुभारंभ करत कहिन के आज के दिन महत्वपूर्ण हे, हमार राष्ट्रीय नेता श्री राहुल गांधी के आज जनम दिन ये, फेर भारत चीन के सीमा म लद्दाख म शहीद होए जवान मन के सुरता म आज सेवा के काम करना हे। हमार कार्यकर्ता सेवा काम म लगे हें। कोरोना संक्रमण के रोकथाम बर मनखे मन ल मास्क अऊ मरीज मन ल फल बांटत हें।
मुख्यमंत्री श्री भूपेश बघेल ह कहिन कि ये योजना के तहत सार्वजनिक स्थल जइसे हाट बाजार, मेला स्थल, धान संग्रहण केंद्र, श्मशान घाट जइसे बहुत अकन महत्वपूर्ण सार्वजनिक उपयोग के केंद्र जऊन बारहमासी सड़क ले नइ जुड़े हे, उहां आए-जाए म जनसामान्य ल असुविधा होथे। अइसन सबो सार्वजनिक स्थल अऊ भवन ल प्राथमिकता के आधार म लोक निर्माण विभाग ह बारहमासी पहुंच मार्ग के निर्माण करके जोड़ही। एखर से शासकीय भवन अऊ सार्वजनिक स्थल मन तक पहुंचे म मनखे मन ल सहुलियत मिलही।
लोक निर्माण विभाग कोति ले ये योजना के अंतर्गत ये साल 200 करोड़ रुपए के 1116 काम कराए जाही। ये बेरा म मुख्य सचिव श्री आर.पी. मंडल, मुख्यमंत्री के अपर सचिव श्री सुब्रत साहू, लोक निर्माण विभाग के सचिव श्री सिद्धार्थ कोमल परदेशी, मुख्य अभियंता लोक निर्माण विभाग श्री वी. के. भतपहरि, प्रधान मुख्य वन संरक्षक श्री राकेश चतुर्वेदी, मुख्यमंत्री सचिवालय म उप सचिव सुश्री सौम्या चौरसिया संग आन वरिष्ठ अधिकारी उपस्थित रहिन।
