प्रधानमंत्री श्री नरेंद्र मोदी के एक अऊ गारंटी होइस पूरा
मुख्यमंत्री श्री विष्णुदेव साय ह रेडी टू ईट निर्माण अउ वितरण बर रायगढ़ म 10 महिला स्व-सहायता समूह मन ल सौंपिन अनुबंध पत्र
लइका मन के पोषण अभियान के संग महिला मन के आर्थिक समृद्धि ल मजबूती देही ये पहल: मुख्यमंत्री श्री विष्णुदेव साय
रायगढ़/ छत्तीसगढ़ सरकार ह प्रधानमंत्री श्री नरेंद्र मोदी के एक ठन अऊ गारंटी ल पूरा करत रेडी टू ईट निर्माण के काम फेर महिला स्व-सहायता समूह मन ल सौंपे के निर्णय म अमल के पहल के शुरुआत आज रायगढ़ जिला ले को हे।
मुख्यमंत्री श्री विष्णुदेव साय ह रायगढ़ म आयोजित कार्यक्रम म 10 महिला स्व-सहायता समूह मन ल रेडी टू ईट निर्माण अउर वितरण बर अनुबंध पत्र सौंपिन। ए बेरा म वित्त मंत्री श्री ओ.पी. चौधरी, रायगढ़ सांसद श्री राधेश्याम राठिया, राज्यसभा सांसद श्री देवेंद्र प्रताप सिंह, विधायक श्री पुरंदर मिश्रा, जिला पंचायत अध्यक्ष श्रीमती शिखा रविंद्र गबेल, महापौर श्री जीवर्धन चौहान अउर जिला पंचायत सदस्य श्रीमती सुषमा खलखो उपस्थित रहिन।
मुख्यमंत्री श्री साय ह कहिन के राज्य सरकार ह आंगनबाड़ी केंद्र मन बर पूरक पोषण आहार (रेडी टू ईट) के निर्माण अउ वितरण के काम महिला स्व-सहायता समूह मन ल सौंपे के निर्णय लेहे हे। ये काम प्रारंभिक चरण म 6 जिला मन म पायलट प्रोजेक्ट के रूप म चालू करे जाही। रायगढ़ ए पहल के पहला जिला बने हे, जेमां 10 महिला स्व-सहायता समूह मन ल अनुबंध पत्र वितरित करे गए हे।
मुख्यमंत्री ह कहिन कि ए समूह मन के बहिनी मन अब आंगनबाड़ी के लइका मन ल पौष्टिक आहार उपलब्ध कराए के संगे-संग ए काम ले अपन आमदनी घलोक बढ़ाहीं, जेखर से ओ मन आर्थिक रूप ले सशक्त बन सकहीं। ये योजना महिला मन ल स्वरोजगार के संग-संग सामाजिक अऊ आर्थिक सशक्तिकरण के दिशा म घलोक एक सार्थक पहल हे। संगेच, लइका मन ल पोषण सहित आहार प्रदान करके राज्य के पोषण स्तर म सुधार लाय म घलोक ये योजना महत्वपूर्ण भूमिका निभाही।
मुख्यमंत्री श्री साय ह अपन संबोधन म कहिन के पाछू डेढ़ साल के कार्यकाल म प्रधानमंत्री श्री नरेंद्र मोदी जी के गारंटी के अधिकांश काम मन ल धरातल म उतारे गए हे। प्रधानमंत्री आवास योजना, 3100 रुपिया प्रति क्विंटल के दर ले धान खरीदी, दू बछर के बकाया बोनस वितरण, महतारी वंदन योजना के तहत महिला मन ल हर महीना 1000 रुपिया के सहायता राशि, तेन्दूपत्ता संग्रहण दर म 5500 रुपिया प्रति मानक बोरा के वृद्धि अउ चरण पादुका योजना के फेर शुरुआत जइसे काम एखर सशक्त उदाहरण हे। संगेच, रामलला दर्शन योजना अउ तीर्थयात्रा योजना के माध्यम ले प्रदेशवासी मन ल धार्मिक स्थल के यात्रा के लाभ घलोक देहे जात हे।
मुख्यमंत्री ह बताइस कि अटल डिजिटल सेवा केन्द्र मन के शुरुआत करे गए हे, जेखर उद्देश्य ग्रामीण क्षेत्र मन के मनखे मन ल ऊंखर गांव म ही बैंकिंग सेवा उपब्ध कराना हे। अब तक प्रदेश के 1,460 पंचायत मन म अइसन सेवा केन्द्र स्थापित हो गए हे, जेखर से हजारों माता अऊ बहिनी सरल, सुरक्षित अऊ सुलभ बैंकिंग सेवा मन के लाभ उठावत हें। अवइया समय म शेष पंचायत मन ल घलोक ए सुविधा ले जोड़े जाही।