महिला समूह मन के जिम्मे होही नौनिहाल मन के पोषण: मुख्यमंत्री श्री विष्णु देव साय

रायपुर, 23 फरवरी 2024। मोदी जी के गारंटी के मुताबिक राज्य सरकार ह रेडी-टू-ईट के संचालन फेर महिला समूह मन ल सौंपे के निर्णय लेहे हे। महिला मन के रोजगार अऊ आजीविका के संकट ल आपके सरकार ह दूर करे के बड़ संवेदनशील फैसला लेहे हे। ए निर्णय ले हम सबो बहुत उत्साहित हन। एखर से हजारों प्रभावित समूह के महिला मन ल संबल मिलही अऊ उंखर गंवागे आत्मसम्मान लहुटही। ये बातें स्वसहायता समूह के महिला मन ह आज मुख्यमंत्री श्री विष्णु देव साय ले ऊंखर विधानसभा कार्यालय स्थित कक्ष म मुलाकात के समय कहीन अऊ ऊंखर प्रति आभार व्यक्त करिन। महिला मन ह कहिन कि हम पूरा प्रदेशभर के 1786 महिला समूह के महिला मन ए निर्णय बर आप मन के हृदय ले धन्यवाद करत हन।
जानबा हे कि महिला अउ बाल विकास मंत्री श्रीमती लक्ष्मी राजवाड़े ह विधानसभा म एक सवाल के जवाब म रेडी टू ईट के संचालन फेर महिला समूह मन ल सौंपे के संबंध म संवेदनशीलता के संग विचार करे के बात कहे रहिन।
सरगुजा ले लेके बस्तर तक के 30 जिला मन ले आए महिला मन ह मुख्यमंत्री ले कहिन कि आप मन के ए निर्णय ले रेडी टू ईट के संचालन ले जुड़े हम सबो महिला मन बहुत खुश हन अऊ आप मन के सम्मान म समारोह आयोजित करके आप मन के अऊ छत्तीसगढ़ सरकार के प्रति आभार जताना चाहत हन। महिला मन ह आयोजित समारोह बर मुख्यमंत्री ल आमंत्रित घलोक करिन ।