प्रदेश म 10 हजार गुरूजी मन के होही भरती: मुख्यमंत्री श्री भूपेश बघेल

रायपुर, छत्तीसगढ़ विधानसभा म काली वित्तीय साल 2022-23 के 2904 करोड़ 41 लाख 70 हजार 571 रूपिया के पहिली अनुपूरक बजट पारित कर दे गीस। मुख्यमंत्री श्री भूपेश बघेल ह पहिली अनुपूरक म सदन म होए चर्चा के सिलसिलेवार जवाब देवत राज्य सरकार के वित्तीय प्रबंधन, उपलब्धि अऊ अनुपूरक बजट के प्रावधान मन के जानकारी दीन।
मुख्यमंत्री ह चर्चा के जवाब देवत होइन बहुत अकन घोषणा तको करिन। उमन कहिन कि प्रदेश म 10 हजार नवा गुरूजी मन के भर्ती प्रक्रिया लउहे चालू होही। उमन कहिन कि साल 1998 के बाद राज्य सरकार कोति ले 14 हजार गुरूजी के भर्ती करे गए हे, जे मन के कागद जांच के बाद नियुक्ति देहे जात हे। मुख्यमंत्री ह कहिन कि हरेली परब ले गौ-मूत्र के खरीदी घलोक शुरू होवत हे। एखर से राज्य म जैविक खेती ल मदद मिलही। उमन कहिन कि पशु मन के उपचार बर 163 मोबाइल वेटनरी यूनिट लउहे चालू करे जाही, ए खातिर अनुपूरक म 10 लाख रूपिया के प्रावधान करे गए हे। गौठान मन म विकसित करे जात महात्मा गांधी ग्रामीण औद्योगिक पार्क म लगइया यूनिट मन ल बिना बिजली के खपत के सीमा के कुल बिजली बिल म हॉफ बिजली बिल योजना के लाभ देहे जाही। अइसनहे मुख्यमंत्री ह सार्वभौम सार्वजनिक वितरण प्रणाली के पीडीएस केन्द्र संचालक मन ल डीलर मार्जिन राशि देहे बर 266 करोड़ रूपिया, अनुसूचित क्षेत्र मन अउ सामान्य क्षेत्र मन म चना वितरण बर 100 करोड़ रूपिया के राशि, हाट-बाजार क्लिनिक योजना के मोबाइल यूनिट मन बर 300 चिकित्सा अधिकारी मन के भर्ती, कोरबा, कांकेर, महासमुंद के मेडिकल कॉलेज के भवन निर्माण, उपकरण मन के व्यवस्था अऊ बिलासपुर के कैंसर संस्थान बर 250 करोड़ रूपिया, 120 देवगुड़ी अउर 94 घोटुल बर 25.50 करोड़ रूपिया, राजिम माघी पुन्नी मेला स्थल विकास बर 1.85 करोड़, गिरौदपुरी अउर भण्डारपुरी के विकास बर एक करोड़, रामायण मंडली के कलाकार मन के संरक्षण अउ संवर्धन अउ कला दल मन के सतत् विकास बर रामायण मंडली प्रोत्साहन योजना बर 10 करोड़ रूपिया, दामाखेड़ा के विकास बर 9 करोड़ रूपिया के बजट प्रावधान करे गीस। अइसनहे अउ जन हित म अड़बड़ अकन घोषणा करे गए हे।