- छत्तीसगढ़ म जमीन के रजिस्ट्री म 13.63 प्रतिशत अऊ राजस्व प्राप्ति म 8.71 प्रतिशत के बढ़ोतरी
- पऊर साल के इही महिना ले ये साल के ये महिना म पंजीयन अऊ राजस्व प्राप्ति म बढ़ोतरी
- राज्य सरकार के छोटे प्लाट मन के खरीदी-बिक्री म छूट अऊ गाइड लाइन रेट संग पंजीयन शुल्क म कमी ले मध्यम वर्ग के मनखे मन ल मिलीस बड़का राहत
रायपुर, 03 नवम्बर 2020। मुख्यमंत्री श्री भूपेश बघेल ह छत्तीसगढ़ म 5 डिसमिल ले छोटे प्लाट मन के खरीदी-बिक्री म लगे रोक ल हटाए रहिन, संगेच सम्पत्ति के सरकारी गाइड लाइन रेट म अऊ पंजीयन शुल्क म कमी जइसे जनता के मनमाफिक निरनय लेहे रहिन। जेकर से खासकर प्रदेश के मध्यम वर्ग के मनखे मन ल अड़बड़ राहत मिले हे। एकर सेती प्रदेश म कोरोना काल म घलोक राजस्व दस्तावेज मन के पंजीयन अऊ राजस्व प्राप्ति म पऊर साल के इही महिना ले ये साल के ये महिना म पंजीयन अऊ राजस्व प्राप्ति म बढ़ोतरी होए हे। साल 2019 के अक्टूबर महिना म 16 हजार 504 दस्तावेज मन के पंजीयन होय रहिस, जबकि साल 2020 के अक्टूबर महिना म 18 हजार 754 दस्तावेज मन के पंजीयन होय हे, जऊन पऊर साल के अक्टूबर महिना ले 13.63 प्रतिशत जादा हे। अइसनहे साल 2019 के अक्टूबर महिना म दस्तावेज मन के पंजीयन ले 117 करोड़ 60 लाख रूपिया के राजस्व प्राप्त होय रहिस, जबकि साल 2020 के अक्टूबर महिना म पंजीयन ले 127 करोड़ 85 लाख रूपिया के राजस्व प्राप्ती होय हे। ये राशि साल 2019 के अक्टूबर महिना के तुलना म 8.71 प्रतिशत जादा हे।
जानबा हे के कोरोना काल म पंजीयन कार्यालय लॉकडाउन के सेती अड़बड़ दिन तक तक बंद रहे हे अऊ कम कर्मचार-अधिकारी संग कोरोना गाइड लाइन प्रतिबंधों के संग संचालित होए हे, तेकर बाद घलव पंजीयन अऊ राजस्व प्राप्ति म बढ़ोतरी दर्ज करे गए हे। राज्य सरकार ह रियल सेक्टर ल पंदोली देहे बर बहुत अकन निरनय लेहे रहिस जेमा छोटे प्लाट मन के खरीदी-बिक्री ले रोक हटाए रहिस, सम्पत्ति के गाइड लाइन रेट म 30 प्रतिशत के कमी करे रहिस, जमीन नामंतरण अऊ डाइवर्सन के प्रक्रिया ल सरल करे गीस। एखर संगेच रजिस्ट्री शुल्क 4 प्रतिशत ले घटाके 2 प्रतिशत करे गीस अऊ पंजीयन बर सिंगल विन्डो प्रणाली ले सबो प्रकार के अनुमति अऊ अनापत्ति प्रमाण पत्र देहे के प्रक्रिया सरल बनाय गीस। प्रदेश म कोरोना संक्रमण ल देखत पंजीयन के ऑनलाइन ई-पंजीयन प्रणाली ले करे जात हे। कोविड-19 ले संक्रमण के सुरक्षा ल देखत पंजीयन बर ऑनलाइन अपॉइंटमेंट स्लॉट बुकिंग ल जरूरी करे गए हे।