अवैध निर्माण के नियमितीकरण के 25 प्रतिशत के राशि निकाय मन ल देहे के घोषणा
मोर महापौर मोर द्वार कार्यक्रम म सामिल होइन मुख्यमंत्री
रायपुर नगर निगम क्षेत्र म जनता के मांग के मुताबिक विकास काम मन बर 10 करोड़ रूपिया के स्वीकृति
रायपुर, मुख्यमंत्री श्री भूपेश बघेल ह काली शहर के सुभाष स्टेडियम म आयोजित मोर महापौर मोर द्वार कार्यक्रम म संघरिन। उमन कार्यक्रम ल सम्बोधित करत कहिन कि सरकार ह ग्रामीण क्षेत्र मन के संगें-संग शहरी क्षेत्र मन म घलोक विकास के बराबर चिंता करे हे। आम नागरिक मन तक सेवा मन ल पहुंचाए बर कई सफल योजना संचालित करे जात हे। मुख्यमंत्री ह कहिन कि अब मनखे मन ल आय, जाति, निवास, शादी के रजिस्ट्रेशन जइसे कागज मन बर दफतर मन के चक्कर नइ काटे ल परय, एखर बर हमन मितान योजना शुरू करे हन। अब अइसन 13 सेवा मनखे मन ल घर बइठे मिलत हे। मुख्यमंत्री रायपुर नगर निगम क्षेत्र म आम जन के समस्या मन ल जाने अऊ ऊंखर मौका म ही निराकरण के अभियान के घलोक खुलके तारीफ करिन। कार्यक्रम म उमन उत्कृष्ट काम करइया निगम के अधिकारी अऊ कर्मचारी मन ल सम्मानित घलोक करिन। एखर संगेच निगम क्षेत्र म शासकीय योजना मन ले लाभान्वित होवइया हितग्राही मन ले घलोक बात करिन। कार्यक्रम म महापौर श्री एजाज ढेबर, रायपुर ग्रामीण विधानसभा के विधायक श्री सत्यनारायण शर्मा, छत्तीसगढ़ गृह निर्माण मंडल के अध्यक्ष श्री कुलदीप जुनेजा, खादी ग्राम उद्योग बोर्ड के अध्यक्ष श्री राजेश तिवारी, छत्तीसगढ योग आयोग के अध्यक्ष श्री ज्ञानेन्द्र शर्मा, नगर निगम के सभापति श्री प्रमोद दुबे संग कलेक्टर श्री सर्वेश्वर भुरे, नगर निगम आयुक्त श्री मयंक चतुर्वेदी अऊ आन अधिकारी अऊ बड़ संख्या म शहरवासी घलोक सामिल होइन।
