रायगढ़, 18 अप्रैल 2020। कोविड-19 ले निपटे बर देशव्यापी लॉक-डाउन के बेरा म गांव मन म संचालित मनरेगा काम ले गांव वाले मन अड़बड़ राहत महसूस करत हें। लॉक-डाउन के बेरा म गांव वाले मन ल काम बर कहूं आन जगा बाहिर झन जाए ल परय ये बात ल सोंचत सरकार ह मनरेगा काम गांव मन म सुरू करवाए हे तिहां उमन ल रोजगार मिलत हे। मनरेगा के मजदूरी ले ओ मन ये कठिन दौर म घलोक अपन आप मन ल सुविधाजनक स्थिति म पावत हें। एखर से ग्रामीण अर्थव्यवस्था ल गति घलोक मिलत हे। अकेला रायगढ़ जिला म 1 अप्रेल के बाद ले श्रमिक मन ल एक करोड़ 14 लाख रूपिया ले जादा के मजदूरी के भुगतान करे गए हे।
राज्य अऊ केन्द्र सरकार के दिशा-निर्देश के मुताबिक अभी रायगढ़ जिला के नौ विकासखण्ड के 473 ग्राम पंचायत मन म एक हजार 512 मनरेगा काम चलत हे। एमां 13 हजार 684 मजदूर मन ल काम मिले हे। जिला के बांचे 292 ग्राम पंचायत मन म मनरेगा काम शुरू करे के प्रशासकीय स्वीकृति देहे जात हे। जल्दीच उहां के गांव वाले मन ल घलोक गांव म ही रोजगार मिल जाही।
शासन के निर्देश के मुताबिक अभी व्यक्तिमूलक अऊ आजीविका संवर्धन के काम मंजूर करे जात हे जेमे कम से कम श्रमिक मन के जरूरत होथे। एखर तहत हितग्राही मन के निजी जमीन म डबरी निर्माण, कुंआ निर्माण, बकरी अउ गाय शेड, वृक्षारोपण अऊ बाड़ी निर्माण जइसे काम लेहे जात हे। सिंचाई विस्तार, जल संचय अऊ जल संरक्षण के काम घलोक प्राथमिकता ले स्वीकृत करे जात हे। ए सबो काम मन के समय कार्यस्थल म शारीरिक दूरी अऊ स्वच्छता के मानक मन के पालन करे जात हे। कोरोना वायरस के संक्रमण रोके मजदूर हाथ धुलाई, मुंह-चेहरा ढांके अऊ मास्क जइसे उपाय घलोक सरलग अपनावत हे।
