रेणुबाला जायसवाल ह बिहान ले जुड़ के बनिस सफल व्यवसायी, कपड़ा दुकान खोल के बढ़ाइस आमदनी

CHHATTISGARHI NEWS: कोरिया, सामाजिक परिवेश म केवल गृहिणी के भूमिका तक सीमित रहइया महिला मन अब अपन मेहनत अउ आत्मविश्वास ले सफल व्यवसायी के रूप म अपन पहचान स्थापित करत हे। राष्ट्रीय ग्रामीण आजीविका मिशन मने बिहान के माध्यम ले महिला मन ला न सिरिफ एक सामूहिक मंच मिलत हे, बल्कि आर्थिक सशक्तिकरण के नवा रद्दा घलो मिलत हे। कोरिया जिला के विकासखंड सोनहत अंतर्गत ग्राम पंचायत कटगोड़ी के श्रीमती रेणुबाला जायसवाल आज इही बदलाव के एक बढ़िया मिसाल बन चुके हे।
रेणुबाला स्व-सहायता समूह से जुड़ के सत्यम महिला स्व-सहायता समूह म अध्यक्ष के रूप म जिम्मेदारी संभालिस। आर्थिक स्थिति सुधारे के उद्देश्य से ओ ह समूह के माध्यम से बैंक ले तीन लाख रुपिया के करजा प्राप्त करिस अउ कपड़ा दुकान के व्यवसाय प्रारंभ करिस। एखर से ओखर आमदनी म उल्लेखनीय वृद्धि होईस अउ वो आत्मनिर्भर बनिस।
रेणुबाला बताइस के सुरुआत म वो समूह के सदस्य के रूप म छोट-छोट लेनदेन ले जुड़े रहिस। बाद म समूह ला आरएफ राशि अउ सीआईएफ के रूप म साठ हजार रुपिया प्राप्त होईस। सफल संचालन के बाद बैंक ले तीन लाख रुपिया के ऋण ले के ओ ह अपन कपड़ा व्यवसाय के विस्तार करिस। पहिली ओखर परिवार के वार्षिक आय लगभग सत्तर हजार रुपिया रहिस, जे ह अब बाढ़ के दू लाख रुपिया ले अधिक होगे हे।
आर्थिक रूप ले सशक्त होय के बाद ओखर सामाजिक जिनगी म घलो सकारात्मक बदलाव आए हे। अब ओ ह परिवार के हर महत्वपूर्ण निर्णय म सक्रिय भागीदारी निभाथे। ओ ह परिवार के सदस्य मन के संग आसपास के हाट-बाजार म घलो कपड़ा के व्यवसाय करत हे।