- शासकीय योजना अउ कार्यक्रम मन के प्रभावी ढंग ले क्रियान्वयन ठउका करव
- गौठान मन ल आजीविका के केन्द्र बनावव
- मुख्यमंत्री ले पाटन क्षेत्र के पंचायत अउ नगरीय निकाय के प्रतिनिधि मन ह करिन मुलाकात
रायपुर, 03 जून 2020। मुख्यमंत्री श्री भूपेश बघेल ह काली अपन निवास कार्यालय म पाटन विधानसभा क्षेत्र ले आए नगरीय निकाय अउ त्रिस्तरीय पंचायत के पदाधिकारी मन ले जनसामान्य के जीवन स्तर म बदलाव लाय बर छत्तीसगढ़ शासन कोति ले संचालित योजना मन के प्रभावी ढंग ले क्रियान्वयन सुनिश्चित करे के आह्वान करिन। मुख्यमंत्री ह कहिन के ग्रामीण अर्थव्यवस्था ल बेहतर बनाए अऊ गांव वाले मन के स्वावलंबन बर छत्तीसगढ़ सरकार कोति ले सुराजी गांव योजना शुरू करे गए हे। ये योजना के तहत नरवा, गरूवा, घुरूवा, बाड़ी के विकास के कार्यक्रम संचालित करे जात हे। गांव म पशु मन के संरक्षण अउ संवर्धन बर गौठान के निर्माण के संगेच आय मूलक गतिविधि शुरू करे गए हे। उमन पंचायत पदाधिकारी मन ले गौठान ल गांव वाले मन के आजीविका के केन्द्र के रूप म विकसित करे के बात कहिन। मुख्यमंत्री ह कहिन के गौठान मन के निर्माण ले खुले चराई प्रथा ल रोके म मदद मिले हे। किसान अब निश्चिंत होके बारह मासी खेती कर सकत हें। गौठान मन के संग जैविक खेती ल घलोक बढ़ावा मिले लगे हे।
