पत्थलगांव, महासमुंद, 11 जनवरी 2021। जशपुर म हाथी मन के आतंक बढ़त ही जावत हे। पत्थलगांव म उत्पाती हाथी मन ह तीन ग्रामीण मन के जान ले लीन हे। येती महासमुंद म घलो हाथी मन के दल ह जमके उत्पात मचाये हे। ग्रामीण मन के बाड़ी अउ फसल मन ल नुकसान पहुंचाये हे। गनीमत हे कि जनहानि नई होइस।
जानकारी के अनुसार पत्थलगांव वनपरिक्षेत्र के सरईटोला, खुंटापानी अउ झिमकी म पहुंचे हाथी मन के दल ह जमके उत्पात मचइस। ये दौरान तीन ग्रामीण मन के पटक-पटक के जान ले लीन। मउत ले ग्रामीण मन म जबरदस्त आक्रोश हे। ग्रामीण मन के कहना हे कि हाथी मन के हमला के चलत हर समय दहशत के साय म गुजरत हे। उहें वन विभाग हाथी मन ल खदेड़े म नाकाम साबित होवत हे। फसल मन ल घलो हाथी मन ह नुकसान पहुंचाये हे।
महासमुंद जिला के 6 ले जादा गांव के लोगन हाथी मन के दहशत म रात गुजारत हे। ग्रामीण मन के कहना हे कि संझा होते ही हाथी मन के दल उंखर गांव म पहुंच जाथे। एखर बाद फसल अउ घर मन ल नुकसान पहुंचा के उत्पात मचाथे।
