मुख्यमंत्री श्री भूपेश बघेल ह प्रदेश म रिवेम्पड डिस्ट्रीब्यूशन सेक्टर स्कीम लागू करे बर दीन सैद्धांतिक सहमति

रायपुर, मुख्यमंत्री श्री भूपेश बघेल आज अपन निवास कार्यालय ले विडियो कांफ्रेंसिग के माध्यम ले भारत सरकार के विद्युत, नवीन अऊ नवीकरणीय उर्जा मंत्री श्री राजकुमार सिंह कोति लेहे गए बैठक म सामिल होइन। मुख्यमंत्री ह केन्द्रीय मंत्री श्री सिंह ले रिवेम्पड डिस्ट्रीब्यूशन सेक्टर स्कीम ल राज्य म लागू करे के संबध म विस्तार ले चर्चा करिन। बैठक म बिहार, गुजरात, पश्चिम बंगाल, मध्यप्रदेश, महाराष्ट्र, गोवा के उर्जा मंत्री अऊ दमन-दीव के प्रशासक घलोक सामिल होइस।
मुख्यमंत्री श्री बघेल ह चर्चा के समय योजना ल सैद्धांतिक सहमति देवत आन राज्य मन कोति ले बिजली सब्सिडी के भुगतान बर अकतहा समय सीमा देहे जाय के मांग के समर्थन करिन। रिवेम्पड डिस्ट्रीब्यूशन सेक्टर स्कीम के तहत प्रदेश म विद्युत अधोसंरचना ल बढ़ाए के संगेच इंकर आधुनिकीकरण अऊ सुदृढ़ीकरण के कार्रवाई होना हे। ये योजना म कृषि उपभोक्ता मन ल छोड़के सबो उपभोक्ता मन के इहां स्मार्ट मीटर लगाए जाही। केन्द्र सरकार कोति ले ये योजना के तहत डिटेल प्रोजेक्ट रिपोट प्रस्तुत करे के समय सीमा 31 दिसंबर 2021 निरधारित करे गए हे। ये योजना के अनुमानित लागत 9600 करोड़ रूपिया हे, जेन ल मार्च 2025 तक पूरा करे के लक्ष्य हे। ये मौका म मुख्यमंत्री निवास म उर्जा विभाग के विशेष सचिव श्री अंकित आनंद घलोक उपस्थित रहिन।