राजस्व प्रकरण मन के निराकरण के समीक्षा बर आनलाइन मानिटरिंग पोर्टल के मुख्यमंत्री ह करिस शुभारंभ

मुख्यमंत्री कार्यालय ले घलोक राजस्व प्रकरण मन के होही सरलग मानिटरिंग
रायपुर, मुख्यमंत्री श्री भूपेश बघेल ह आज अपन निवास कार्यालय ले राजस्व प्रकरण मन के निरधारित समय सीमा म निराकरण के समीक्षा बर आनलाइन मानिटरिंग पोर्टल के शुभारंभ करिन। ये पोर्टल के माध्यम ले नामांतरण, खाता विभाजन, सीमांकन, व्यपवर्तन अऊ वृक्ष कटाई समेत आन राजस्व काम मन के मुख्यमंत्री कार्यालय, राजस्व मंत्री कार्यालय समेत वरिष्ठ अधिकारी मन कोति ले सतत् मानिटरिंग करे जा सकही।
राजस्व प्रकरण मन के निराकरण लोक सेवा गारंटी अधिनियम के तहत समय सीमा के भीतर करे जाना हे। फेर राजस्व प्रकरण मन के निराकरण म देरी होए ले आम नागरिक मन ल परेशानी के सामना करना परथे। आम नागरिक मन के सुविधा अउ राजस्व प्रकरण मन के सतत् समीक्षा बर मुख्यमंत्री श्री भूपेश बघेल ह राजस्व प्रकरण मन के निराकरण के आनलाइन मानिटरिंग व्यवस्था करे के निर्देश राजस्व विभाग ल देहे रहिन।
नामांतरण, खाता विभाजन, सीमांकन, व्यपवर्तन अऊ वृक्ष कटाई के समय सीमा के बाहिर के अनिराकृत प्रकरण मन के निराकरण बर भुइयां साफ्टवेयर म आनलाइन मानिटरिंग पोर्टल के व्यवस्था करे गए हे। प्रकरण मन के समय म निराकरण होवय, एखर बर मानिटरिंग पोर्टल के माध्यम ले मुख्यमंत्री कार्यालय, राजस्व मंत्री कार्यालय, मुख्य सचिव कार्यालय, सचिव राजस्व विभाग, संचालक भू-अभिलेख, संभाग आयुक्त अउ जिला कलेक्टर के स्तर ले सीधा मानिटरिंग करे जाही।