रायपुर 03 जुलाई 2024। प्रधानमंत्री श्री नरेन्द्र मोदी ह इतवार के मन के बात म देशवासी मन ले ’एक पेड़ मां के नाम’ लगाय के गिलोली करे रहिन ते बात म आज राजस्व मंत्री टंक राम वर्मा ह बलौदाबाजार के संयुक्त जिला कार्यालय परिसर म नीम पेड़ लगाके जिला म अभियान के शुरुआत करिन। ये कार्यक्रम के आयोजन वनमंडल बलौदाबाजार के संग करिन। ए बेरा म नगर पालिका परिषद अध्यक्ष चित्तावर जायसवाल, कलेक्टर दीपक सोनी, डीएफओ मयंक अग्रवाल ह घलोक एक पेड़ अपन मां के नाम म रोपण करिन।
कार्यक्रम म श्री वर्मा ह स्कूली लइका मन ल पर्यावरण संरक्षण ले जोड़े बर एक पेड़ अपन मां के नाम लगाय के अपील करिन। एखर संगेच जिला के सबो स्कूल, हॉस्पिटल अउ आंगनबाड़ी मन म अभियान चलाके वृहद वृक्षारोपण करे के निर्देश सम्बंधित अधिकारी मन ल दीन। उमन कहिन के एक पेड़ मां के नाम के आह्वान ले लइका मन के पर्यावरण ले जुड़ाव बाढ़ही। ये मां पालक अऊ शिक्षक मन ल सामिल करे ले निश्चित ही बड़ पैमाना म पौधरोपण हो सकही। काबर कि सबो मां के नाम म पेड़ लगाहीं ते पाए के एखर रख-रखाव घलोक बड़ जिम्मेदारी ले हो सकही।
ए मौका म जिला पंचायत सीईओ दिव्या अग्रवाल, अपर कलेक्टर दीप्ति गौते सबो एसडीएम, सीईओ, सीएमओ संग आन विभाग मन के जिला अधिकारी कर्मचारी गण उपस्थित रहिन। ए बेरा म सबो अधिकारी कर्मचारी मन ह घलोक परिसर म एक पेड़ अपन मां के नाम म रोपण करिन।