रायपुर 24 मई 2024। छत्तीसगढ़ के मुख्य निर्वाचन पदाधिकारी श्रीमती रीना बाबासाहेब कंगाले ह काली राजनांदगांव, दुर्ग अऊ महासमुंद के दौरा करके अवइया 4 जून के होवइया मतगणना के तैयारी मन के जांच करिन। उमन तीनों जिला मुख्यालय मन म स्ट्रांग-रूम म रखे ईवीएम के सुरक्षा व्यवस्था के जायजा लीन। उमन मतगणना बर तैयार करे जात मतगणना कक्ष के अवलोकन करिन। श्रीमती कंगाले ह निर्बाध अऊ सुव्यवस्थित मतगणना बर मतगणना स्थल म कई ठन व्यवस्था मन के संबंध म अधिकारी मन ल जरूरी दिशा-निर्देश घलोक दीन। अकतहा मुख्य निर्वाचन पदाधिकारी श्री निलेशकुमार महादेव क्षीरसागर, सहायक मुख्य निर्वाचन पदाधिकारी श्रीमती रश्मि वर्मा अऊ दुर्ग संभाग के आयुक्त श्री सत्यनारायण राठौर संग तीनों जिला के कलेक्टर अउ जिला निर्वाचन अधिकारी, पुलिस अधीक्षक, उप जिला निर्वाचन अधिकारी अउ सहायक रिटर्निंग अधिकारी घलोक ए बेरा उपस्थित रहिन।
मुख्य निर्वाचन पदाधिकारी श्रीमती रीना बाबासाहेब कंगाले ह तीनों जिला मन म विधानसभावार मतगणना कक्ष, उम्मीदवार अउ ऊंखर गणना अभिकर्ता मन के बैठक व्यवस्था, प्रवेश पास, सीसीटीवी कैमरा के माध्यम ले मॉनिटरिंग, मतगणना के दिन वीडियोग्राफी, सुरक्षा व्यवस्था, बैरीकेडिंग, डाक मतपत्र अउ वीवीपैट पर्ची के गिनती के व्यवस्था, मीडिया सेंटर अउ उद्घोषणा स्थल के जायजा लीन। उमन बताइन कि मतगणना हॉल म मोबाइल फोन, आईपेड, लैपटॉप, स्मार्ट वॉच, कैमरा अउ आन इलेक्ट्रॉनिक उपकरण प्रतिबंधित रहिही। मीडिया प्रतिनिधि मीडिया सेंटर तक मोबाइल ले जा सकत हें। उमन मीडिया प्रतिनिधि मन ल छोटे-छोटे समूह मन म मतगणना काम के अवलोकन कराए ल निर्देशित करिन। श्रीमती कंगाले ह मतगणना स्थल अऊ मतगणना कक्ष के ड्राइंग-डिजाइन के अवलोकन करके निर्वाचन अभिकर्ता मन के सुविधा बर एला मतगणना स्थल म प्रदर्शित करे के निर्देश दीन जेखर से अभिकर्ता अपन निरधारित मतगणना कक्ष तक सुगमता ले पहुंच सकंंय। उमन मतगणना स्थल म विधानसभावार मतगणना कक्ष तक पहुंचे बर बनाय गए मार्ग के घलोक अवलोकन करिन।
श्रीमती कंगाले ह तीनों जिला म मतगणना स्थल मन म सहायक रिटर्निंग ऑफिसर्स (एआरओ) ले चर्चा करके मतगणना बर टेबल के व्यवस्था के संबंध म जरूरी निर्देश दीन। उमन वोट के गिनती बर कंट्रोल यूनिट ल स्ट्रांग-रूम ले मतगणना कक्ष तक लाय अऊ वापस ले जाय के व्यवस्था के बारे म घलोक जानकारी लीन। उमन स्ट्रांग-रूम के बाहिर मौजूद राजनीतिक दल के प्रतिनिधि मन ले चर्चा करके स्ट्रांग-रूम के सुरक्षा अउ मॉनिटरिंग व्यवस्था अउ मतगणना स्थल म इंतजाम मन के संबंध म फीडबैक घलोक लीन। ए म दल मन के प्रतिनिधि मन ह सुरक्षा व्यवस्था ल पुख्ता बतात अपन संतुष्टि जताईन। जानबा हे कि लोकसभा आम निर्वाचन-2024 बर प्रदेश म तीन चरण म डाले गए वोट मन के गिनती अवइया 4 जून के सबो जिला मुख्यालय मन म होही।
