- बाढ़ प्रभावित मन ल प्रमुखता ले राहत शिविर मन म पहुँचाए के दीन हुकुम
- जिला म स्थिति अब नियंत्रण म – कलेक्टर श्री चंदन कुमार
सुकमा, 29 अगस्त 2020। मुख्यमंत्री श्री भूपेश बघेल ह सुकवार के संझा वीडियो कॉन्फ्रेसिंग के माध्यम ले सबो जिला मन के बाढ़ प्रभावित क्षेत्र मन के समीक्षा करिन अऊ बाढ़ के समय क्षति के जानकारी लीन। कॉन्फ्रेंसिंग म सबो जिला के कलेक्टर, पुलिस अधीक्षक अऊ वनमण्डलाधिकारी मन ह अपन जिला मन म बाढ़ ले होए नकसान, अभी हाल म चलत आपदा प्रबंधन, नदिया-नरवा अऊ जलाशय मन म जलभराव के स्थिति के जानकारी दीन। मुख्यमंत्री ह बाढ़ आपदा के समय मुख्य रूप ले जनहानि कम करे बर प्रबंधन उपर जोर देवत कहिन के जऊन क्षेत्र मन म बाढ़ के स्थिति उत्पन्न होए के आशंका हे, उहां के रहवासी मन ल प्राथमिकता ले राहत शिविर म पहुंचाए जाय। राहत शिविर मन म भोजन, स्वच्छ पेयजल संग आन जरूरी व्यवस्था, कोविड-19 प्रोटोकॉल ल ध्यान म रखत छउका करे के हुकुम उमन दीन। बाढ़ आपदा ले होए जनहानि, पशुहानि अऊ क्षतिग्रस्त मकान अऊ फसल बर हितग्राही मन ल जल्दी ले जल्दी सहायता राशि देहे के हुकुम तको दीन। एखर संगेच शासकीय संपत्ति ल नुकसान के जानकारी सकेले के हुकुम घलोक दीन। उमन बाढ़ के समय आपदा प्रबंधन बर जिला प्रशासन, पुलिस प्रशासन, वन विभाग, स्वास्थ्य विभाग संग आन सबो विभाग मन ल एकजुट होके काम करे करे ल कहिन।
सुकमा जिला म 134 मकान क्षतिग्रस्त होए हे अउ 82 हेक्टेयर के फसल खराब होए हे। प्रभावित मन ल सहायता राशि के प्रकरण तियार करे के बारे म कलेक्टर श्री चंदन कुमार ह बताइस के सुकमा जिला म 15 अगस्त ले 18 अगस्त तक होए अतिवृष्टि ले नदी नाला उफान म रहिस जेखर से बाढ़ के स्थिति निर्मित होए के सेती नुकसान होय हे। उमन बताइन के ये मानसून के समय 9 मनखे मन के मृत्यु होए हे, उहें 20 पशु मन के घलोक हानि होए हे। जिला म कुल 134 मकान क्षतिग्रस्त होए हे जेमा 25 पूरा अऊ 109 आंशिक नुकसान हे। बाढ़ के बेरा म जिला म एको जनहानि अऊ पशुहानि नइ होए हे फेर 47 मकान मन ल क्षति पहुंचे हे। एखर संगेच बाढ़ के पानी खेत मन म घुस जाय ले करीबन 82 हेक्टेयर म लगे फसल के नुकसान घलोक होय हे। उमन बताइन के बाढ़ ले नुकसान बर हितग्राही मन ल देहे जाए वाले सहायता राशि के प्रकरण तियार करे जा चुके हे।
