- विश्व आदिवासी दिवस म आयोजित कार्यक्रम म मुख्यमंत्री ह रायपुर म सौंपिस सामुदायिक वन संसाधन के अधिकार
- टायगर रिजर्व क्षेत्र म वन अधिकार प्राप्त करइया प्रदेश के पहिली जिला बनिस धमतरी
धमतरी 10 अगस्त 2020। विश्व आदिवासी दिवस के अवसर म मुख्यमंत्री श्री भूपेश बघेल ह एक ऐतिहासिक निर्णय के तहत सीतानदी-उदंती टायगर रिजर्व क्षेत्र के गांव वाले मन ल वन अधिकार मान्यता पत्र प्रदान करिन। टायगर रिजर्व क्षेत्र म सामुदायिक वन संसाधन के अधिकार प्राप्त करे के मामला म ये प्रदेश के पहिली प्रकरण ये। मुख्यमंत्री ह वीडियो कान्फ्रेंसिंग के माध्यम ले एखर बधाई देवत एला आदिवासी मन ल जंगल अऊ जमीन के सही हकदार निरूपित करिन। शासन के ये निर्णय ले वो गांव वाले मन ल कड़का राहत मिलही, जेमन कई बछर पहिली रिजर्व वन क्षेत्र म जीविकोपार्जन के अधिकार मांगे रहिन अऊ अपन हक बर कइ दशक ले प्रयासरत रहिन।
विश्व आदिवासी दिवस के अवसर म रायपुर म आयोजित कार्यक्रम म मुख्यमंत्री ह अपन उद्बोधन के बाद जिला के नगरी विकासखण्ड के ग्राम करका ले गे हितग्राही मन ल वीडियो कान्फ्रेंसिंग के संग सामुदायिक वन संसाधन के अधिकार पत्र सौंपिन। सहायक आयुक्त आदिवासी विकास ह बताइस के नगरी के ग्राम पंचायत रिसगांव के आश्रित ग्राम करका म 2208.874 हेक्टेयर के सामुदायिक पट्टा अऊ हितग्राही श्री जोहनराम निवासी ग्राम हिर्रीडीह ल 2.747 हेक्टेयर क्षेत्र के वन अधिकार मान्यता पत्र प्रदान करे गीस। अइसनहे इतवार 09 अगस्त के दिन सिहावा विधायक डा. लक्ष्मी ध्रुव ह हितग्राही श्रीमती कुशन बाई ल 0.060 हेक्टेयर, श्रीमती गणेशिया बाई ल 0.550 हेक्टेयर अऊ श्री छेरकूराम ल 0.251 हेक्टेयर व्यक्तिगत वन अधिकार अऊ ग्रामसभा भुरसीडोंगरी ल कमारतालाब बर 0.500 हेक्टयेर, ग्रामसभा दुगली ल कमारतालाब बर 1.100 हेक्टेयर, ग्रामसभा टांगापानी ल श्मशानघाट बर एक हेक्टेयर, ग्रामसभा गजकन्हार ल छोटे वनोपज संग्रहण बर 484.763 हेक्टेयर अऊ ग्रामसभा संबलपुर ल आवर्ती चारागाह बर 4 हेक्टेयर क्षेत्र के सामुदायिक वन अधिकार मान्यता पत्र वितरित करे गीस।
उमन बताइन के अइसनहे विश्व आदिवासी दिवस के अवसर म मगरलोड विकासखण्ड म जनपद पंचायत मगरलोड के अध्यक्ष श्रीमती ज्योति ठाकुर ह ग्रामसभा मड़ेली ल श्मशानघाट बर एक हेक्टेयर अऊ ग्रामसभा बेंद्राचुवा ल बड़े मुड़ातालाब म मछलीपालन बर 2.480 हेक्टेयर के सामुदायिक वन अधिकार मान्यता पत्र वितरित करिस। वीडियो कान्फ्रेंसिंग म जिला के प्रतिनिधि के तौर म कलेक्टर श्री जयप्रकाश मौर्य, जिला पंचायत अध्यक्ष श्रीमती कांति सोनवानी, जिला शिक्षा अधिकारी श्रीमती रजनी नेल्सन संग प्रयास आवासीय विद्यालय मन म चुने गे होइन उत्कृष्ट विद्यार्थी अऊ जिला के मेधावी छात्र घलोक उपस्थित रहिन।