रायपुर छत्तीसगढ़ सरकार के अल्पकालीन कृषि ऋण माफी योजना म नारायणपुर जिला के करलखा गांव के निवासी किसान श्री बलराम के कृषि ऋण माफ होए ले ओला आर्थिक बल मिले हे। बलराम के भरा-पूरा परिवार हे, जेमां दू बेटा अऊ दू बेटी हे। तीन एकड़ खेत हे। जेमां किसानी के काम करके परिवार के भरण-पोषण करत हें। बलराम ह खेती-किसानी अऊ कृषि यंत्र बर करीबन दू लाख रूपिया के बैंक ले कर्ज ले रहिन। कर्ज राशि के अदायगी अपन खेत ले होवइया फसल ल बेच के करत रहिन। वो ह परिवार के दूध दही आदि के जरूरत बर कुछ गाय घलोक पाल रखे हे।
राज्य शासन के अल्पकालीन कृषि ऋण माफी योजना म आन किसान मन के कृषि ऋण माफी के संग ओखर घलोक करिबन दू लाख रूपिया के कृषि ऋण माफ होए हे। राज्य शासन कोति ले ओ ल ऋण माफी प्रमाण पत्र घलोक मिल गए हे। बलराम अब पूरा ईमानदारी अऊ मेहनत के संग खरीफ फसल बर खेत म उतर गे हे। बलराम ह अपन करलखा गांव स्थित घर के पीछू बाड़ी म सरकारी योजना के लाभ लेके डबरी के घलोक निर्माण कराये हे। छत्तीसगढ़ सरकार के एजेंसी क्रेडा (अक्षय ऊर्जा विकास अभिकरण) कोति ले सौर चलित सिंचाई पम्प के लगाए हे। जेकर मदद ले वो मौसम अऊ जरूरत के हिसाब ले सिंचाई करके साग-सब्जी के पैदावार घलोक कर लेथे। जेखर से उंखर अकतहा आमदनी हो जाथे।
