धमेन्द्र निर्मल के सार समाचार, जिला सहकारी बैंक के मुख्य कार्यपालन अधिकारी ह जिला सहकारी समिति मन ल निर्देशित करे हावय कि अल्पकालिक कृषि ऋण वितरित करे बर किसान मन ले अलग से बी-1 अउ खसरा (पी -2) के पटवारी ले हस्ताक्षरित प्रति के मांग झन करे जाय। ऋण पुस्तिका अथवा किसान किताब (भू अधिकारी पुस्तिका) के आधार म ऋण वितरण करे जाय।
उल्लेखनीय हे कि कोनो कोनो समिति अउ बैंक मन डाहर ले ऋण वितरण के पहिली किसान मन ले बी-1 अउ खसरा (पी -2) के पटवारी ले प्रमाणित हस्ताक्षरित प्रति के मांग करे जाए ले किसान मन ल ऋण प्राप्ति म विलंब के स्थिति निर्मित होवत हावय। उन मन येहू घलो बताइन कि छत्तीसगढ़ शासन के भुईंया पोर्टल म किसान मन के भूमि संबंधी रिकॉर्ड अउ बी-1 अउ खसरा (पी -2) ऑनलाईन प्रदर्शित होवत हे अउ भुईंया पोर्टल के अंतर्गत जम्मो बैंक शाखा समिति मन ल आईडी पासवर्ड जारी कर दे गे हावय।
चटकारा
डेरहा:- अरे इतवारी के घर तो ए गली ले जातिस त बने सीधा अउ तीर परतिस तैं वो बिचारा सगा ल वो गली ले काबर रस्ता बताए हस ?
भकाड़ू:- जब ए मन खुदे चार भाँवर किंदरही तभे इंकरो रगड़ा ह टूटही, नइ तो का हे एहू मन ह लाद दे लदा दे तीन कोस अमरा दे कस किस्सा मुड़ म चढ़ जथे बिया मन। अउ सब बात के एक बात हमरो मन ल थोक बहुत रसा मिल जथे।
