क्रिकेट स्टार रिंकू सिंह पहुंचिस रायपुर! मुख्यमंत्री ले खास मुलाकात म खुलिस छत्तीसगढ़ म नवा खेल क्रांति के रद्दा

रायपुर, भारतीय क्रिकेट टीम के धमाकेदार बल्लेबाज़ अऊ अंतरराष्ट्रीय खिलाड़ी रिंकू सिंह ह काली मुख्यमंत्री विष्णु देव साय ले ऊंखर रायपुर स्थित निवास कार्यालय म सौजन्य मुलाकात करिस। मुख्यमंत्री ह ओखर स्वागत शाल अऊ नंदी के चिनहा भेंट करिस। ए बेरा म विधायक सुशांत शुक्ला घलोक मौजूद रहिस।
मुख्यमंत्री साय ह रिंकू सिंह ल ऊंखर उत्कृष्ट प्रदर्शन अऊ भारतीय क्रिकेट टीम म देहे जात महत्वपूर्ण योगदान खातिर शुभकामना दीस। मुलाकात म छत्तीसगढ़ के समृद्ध संस्कृति, परम्परा अऊ प्रदेश म खेल ल नवा दिशा देहे खातिर होवत उदीम मन म सार्थक चर्चा होइस।
मुख्यमंत्री ह रिंकू सिंह ल राज्य के अजब पहल बस्तर ओलंपिक के बारे म विस्तार ले बताइन अऊ कहिन के ए आयोजन ले स्थानीय प्रतिभा मन ल बड़का पहिचान मिलत हे। उमन कहिन के छत्तीसगढ़ के युवा मन म अपार क्षमता हे अऊ राज्य सरकार आधुनिक खेल सुविधा मन के विस्तार खातिर सरलग कदम उठावत हे।
रिंकू सिंह ह घलोक राज्य सरकार के खेल-अनुकूल नीति मनके सराहना करिन अऊ कहिन के छत्तीसगढ़ के युवा मन ल राष्ट्रीय अऊ अंतरराष्ट्रीय स्तर म आगू बढ़े के बेहतर अवसर मिलत हे। मुलाकात सौहार्दपूर्ण रहिस अऊ एला छत्तीसगढ़ म खेल मन के नवा युग के संभावित शुरुआत के रूप म देखे जात हे।