उद्योग अऊ निजी क्षेत्र के प्रतिनिधि मन के संग राज्य योजना आयोग म कार्यशाला

रायपुर, मुख्यमंत्री श्री भूपेश बघेल के पहल म ग्रामीण अर्थव्यवस्था ल मजबूत बनाए बर चालू करे गए महात्मा गांधी रूरल इंडस्ट्रियल पार्क के मॉडल ल अऊ जादा मजबूत बनाए बर आज राज्य योजना आयोग के महात्मा गाँधी सभा कक्ष म शासन के रीपा योजना के अंतर्गत कई ठन इंडस्ट्रीज अऊ कॉर्पोरेट स्टेकहोल्डर के संग कार्यशाला आयोजित करे गीस। ये कार्यशाला म रीपा मॉडल ल अऊ जादा मजबूत बनाए बर रूरल इंडस्ट्रियल पार्क म प्रायवेट सेक्टर्स के भागीदारी उपर जोर देहे गीस। कार्यशाला म ग्रामीण कृषि अऊ गैर कृषि क्षेत्र ले संबंधित 30 ले जादा निजी क्षेत्र के संस्था मन ह संघरिन।
कार्यशाला के सुरू म मुख्यमंत्री के योजना अऊ नीति सलाहकार श्री प्रदीप शर्मा ह सबो भाग लेवईया मन ल राज्य सरकार के फ्लैगशिप कार्यकम नरवा, गरूवा, घुरवा, बाड़ी (एनजीजीबी) उपर परखर जानकारी दीन। उमन गौठान ले लेके रीपा तक के सफर के जानकारी देवत, रीपा मॉडल के हर पहलू के उल्लेख करिन अऊ रीपा के अंतर्गत अवइया उद्यम अऊ कई पहलु मन के विस्तृत जानकारी दीन। उमन रीपा मॉडल ल अऊ मजबूत करे बर प्राइवेट सेक्टर्स के भागीदारी उपर घलोक जोर दीन। ये बेरा म श्री प्रदीप शर्मा ह बताइन कि रीपा के मुख्य उद्देश्य ग्रामीण अर्थव्यवस्था ल सुदृढ़ बनाना अऊ ग्रामीण क्षेत्र मन म आजीविका संवर्धन के नवा आयाम विकसित करना हे।
राज्य योजना आयोग के उपाध्यक्ष श्री अजय सिंह ह कार्यशाला म बदलत आर्थिक परिस्थिति म ग्रामीण क्षेत्र मन म निवेश अऊ आर्थिक संभावना मन उपर अपन बात रखिन, संगेच ग्रामीण अर्थव्यवस्था ल मजबूत करे बर शासन के उदीम मन जानकारी दीन। उमन ग्रामीण युवा मन के रोजगार बर शहर मन म निर्भरता ल कम करे बर ग्रामीण क्षेत्र मन म रोजगार अऊ उद्यमिता बढ़ाए म रीपा के भूमिका उपर जोर दीन।