रिसाली म नागरिक सुविधा के बढ़ोतरी बर होही हर संभव काम : श्री भूपेश बघेल

दुर्ग, 12 जनवरी 2021। दुर्ग के रिसाली नगर निगम म रहवईया मन बर आज के दिन ऐतिहासिक रहिस। मुख्यमंत्री श्री भूपेश बघेल ह रिसाली निगम के नवा कार्यालय के शुभारंभ करिन। मुख्यमंत्री ह ये बेरा म रिसाली निगम म 12 करोड़ 74 लाख रूपिया के काम मन के लोकार्पण अऊ 1 करोड़ 59 लाख रूपिया के काम के भूमिपूजन करिन। ये मौका म उमन राजीव गांधी आश्रय योजना अऊ मुख्यमंत्री आबादी पट्टा योजना के हितग्राही मन ल भूमिस्वामी अधिकार घलोक सौंउपिन। ये मौका म जिला के प्रभारी मंत्री अऊ वन मंत्री श्री मोहम्मद अकबर, गृहमंत्री श्री ताम्रध्वज साहू, नगरीय प्रशासन अऊ विकास मंत्री डॉ. शिव कुमार डहरिया घलोक उपस्थित रहिन।
मुख्यमंत्री ह ये मौका म रिसाली निगम म 30 बिस्तर अस्पताल तुरंत सुरू करे के हुकुम दीन। उमन कहिन के ये अस्पताल ल 100 बिस्तर तक बढ़ाए जाही। एखर संगेच रिसाली म आउटडोर स्टेडियम घलोक बनाए जाही। उमन बगइचा बनाए बर 50 लाख रूपिया के स्वीकृति दीन अऊ तरिया मन के जीर्णोद्धार काम के घलोक घोषणा करिन। श्री बघेल ह कहिन के रिसाली निगम के जरूरत के मुताबिक नागरिक मन के संग मिलके उंखर फीडबैक लेके कार्य योजना तियार करे जाही अऊ काम सुरू करे जाही। उमन कहिन के रिसाली नगर निगम के विकास सर्वोच्च प्राथमिकता हे। इहां सबो जरूरत जइसने अस्पताल, महाविद्यालय सामुदायिक भवन आदि सबो जरूरत मन के संबंध म विकास के खाका तियार करे जात हे, रिसाली निगम म जऊन प्रकार ले मांग आही ओखर परीक्षण करके ओ मन ल तुरंते स्वीकृत करे जाही।