उत्तर बस्तर कांकेर, 15 जुलाई 2020। मनरेगा के तहत होवत जल अऊ आजीविका संवर्धन के काम मन ह किसान मन के आत्मविश्वास बढ़ाके ऊंखर चेहरा म चमक लाए हे। एखर अंतर्गत होवत जल संचय अऊ जल संवर्धन के काम मन ले जिहां सिंचाई सुविधा मन के विस्तार होवत हे, उहें मछलीपालन के रूप म अकतहा कमाई के जरिया घलोक मिलत हे। काँकेर जिला के किसान श्री नूतन दर्रो अब पूरा आत्मविश्वास ले खेती करत हे। ओ ल यकीन हे के पउर साल के मुताबिक ये साल घलोक वोखर फसल ल अनियमित वर्षा या कम बारिश ले नुकसान नइ होवय। डबरी के पानी ले वोखर खेत हरा-भरा रइही।
भानुप्रतापपुर विकासखण्ड के चिचगाँव के श्री नूतन दर्रो ह साल 2018-19 म मनरेगा के तहत अपन खेत म निजी डबरी के निर्माण करवाए रहिस। डबरी खुदाई के बाद वो ह उही साल धान अऊ काला चना के बनेच पैदावार लेहे रहिस। ये साल डबरी म मछलीपालन करके कोविड-19 के सेती लागू लॉक-डाउन अवधि म घलोक बने कमाई करे हे। पाछू दू साल ले ओ ह डबरी म बारिश के पानी के संचय करके खेत मन के सिंचाई के संग मछलीपालन घलोक करत हे। मछली बेचके अब तक ओ ह 50 हजार रूपिया कमा उरे हे। लॉक-डाउन के बेरा म वो ह 20 हजार रूपिया के मछरी बेचे रहिस। श्री नूतन दर्रो ह डबरी बने के बाद होए कमाई ले सबले पहिली अपन 20 हजार रूपिया के उधारी चुकाईस, बाकी बचे पइसा ले अपन लइका मन के पढ़ाई अऊ खेती-बाड़ी म खरचा करिस।
