भिलाई, नगर निगम के नवा कमिश्नर ऋतुराज रघुवंशी आज भिनसरहा दस बजे निगम कार्यालय पहुंचके भिलाई निगम के बदली होए आयुक्त एस के सुंदरानी ले चार्ज लेके अपन पदभार ग्रहण करिस। कमिश्नर श्री रघुवंशी 2014 बैच के आईएएस हे। एखर ले पहिली ओ मन राजनांदगांव, रायगढ़ म सेवा देहे के बाद महासमुंद के जिला पंचायत म सीईओ के कार्यभार संभालत रहिन। ओखर बाद शासन ह उंखर बदली भिलाई निगम म आयुक्त के पद म करे हे।
पदभार ग्रहण करे के बाद ओ मन सीधा कलेक्टर अंकित आनंद ले मुलाकात करिन। एखर बाद ओ मन निगम आके निगम के सबो विभाग मन के निरीक्षण करिन अऊ डेंगू के संबंध म अधिकारी मन के बैठक लीन। ये बैठक म स्वास्थ्य अधिकारी धर्मेन्द्र मिश्रा संग सबो छ: जोन के आयुक्त उपस्थित रहिन। बैठक ल संबोधित करत नवा आयुक्त श्री रघुवंशी ह कहिन कि आप मन रोजेच संझा डेंगू के बारे म मोला रिपोट देवव, मानिटरिंग बने सहिन करव भलुक जोन कमिश्नर खुदे मानिटरिंग करव। डेंगू ल लेके पाछू साल के गलती दुबारा नइ दोहए जाना चाही। उमन अधिकारी मन ल साफ शब्द म कहिन कि अपन मातहत कर्मचारी मन ले समन्वय बनाके काम लेवव।