छत्तीसगढ़ के अर्थव्यवस्था ल गति देहे खातिर रोड मैप तैयार

रायपुर, 26 फरवरी 2024। छत्तीसगढ़ सरकार के वित्तीय साल 2024-25 के बजट म छत्तीसगढ़ ल विकसित अऊ समृ़द्ध राज्य बनाए बर रोड मैप के परखर डांड दिखत हे। छत्तीसगढ़ सरकार के बजट म सेवाक्षेत्र ल बढ़ावा देहे के रणनीति सामिल करे गए हे। आईटी सेक्टर, हेल्थ डेस्टिनेशन, ईको-टूरिज्म सर्किट, वेडिंग डेस्टिनेशन, बिजनेस टूरिज्म, कान्फ्रेंस डेस्टिनेशन जइसे नवा उभरत संभावना वाले क्षेत्र मन के लाभ प्रदेश के युवा अऊ उद्यमी मन ल मिलही।
बजट म उद्योग ल बढ़ावा देहे बर खुले मन ले राज्य म निवेशक मन के स्वागत करे के बात कहे गए हे, एखर बर राज्य म रेड टेपिज्म के जगा रेड कारपेट के नीति होही। उद्योग के स्थापना बर ‘मिनिमम गर्वमेंट, मैक्सिमम गवर्नेंस’ के नीति म काम होही। इज ऑफ डूइंग बिजनेस, सिंगल विण्डो प्रणाली, ऑनलाईन परमिशन, मिनिमम परमिशन जइसे नीति लागू होही। पब्लिक-प्राइवेट-पॉर्टनरशिप बर नीति आयोग अऊ भारतीय प्रबंध संस्थान के खांटी जानकार के सहयोग ले जाही।
छत्तीसगढ़ के भौगोलिक विशेषता के मुताबिक आर्थिक विकास बर विकेन्द्रीकृत नीति उपर काम होही, एखर बर विकेन्द्रीकृत विकास पॉकेट के स्थापना करे जाही। रायपुर, भिलाई संग तीर तखार के क्षेत्र मन ल स्टेट कैपिटल के रूप म विकसित करे के योजना घलोक तैयार करे जाही। ए क्षेत्र मन म विश्व स्तरीय आईटी सेक्टर, वेडिंग डेस्टिनेशन, हेल्थ डेस्टिनेशन के रूप म विकसित करे जाही। नवा रायपुर, अटल नगर म ‘लाईवलीहुड सेंटर ऑल एक्सीलेंस’ अउ दुर्ग जिला म ‘सेंटर ऑॅफ एंटरप्रेन्योरशिप’ स्थापित करे जाही। स्टार्ट-अप ल प्रोत्साहित करे बर इन्यूबेशन सेंटर के स्थापना अउ बी.पी.ओ. अउ के.पी.ओ. ल आकर्षित करे बर आई.टी. पार्क के स्थापना करे जाही।
छत्तीसगढ़ राज्य के बजट म रायपुर, नवा रायपुर अटल नगर, बिलासपुर, दुर्ग, भिलाई, अंबिकापुर, जगदलपुर, कोरबा अउ रायगढ़ जइसे प्रमुख नगर ल ग्रोथ इंजन के रूप म विकसित करे के बात कहे गए हे। कोरबा, जांजगीर, रायगढ़, उरला, सिलतरा जइसन क्षेत्र मन म उहां के जरूरत के मुताबिक औद्योगिकरण के नीति बनाए जाही। मैदानी कृषि प्रधान जिला मन म कृषि आधारित विकास ल बढ़ावा देहे जाही। ग्रामीण अर्थव्यवस्था ल मजबूती प्रदान करे बर विशेष फोकस करे जाही।
बस्तर-सरगुजा क्षेत्र म आर्थिक विकास के दृष्टि ले एयर कनेक्टिविटी ल बढ़ाए बर सार्थक पहल करे जाही। ए क्षेत्र मन ल इको-टूरिज्म अउ नैचरोपैथी डेस्टिनेशन के रूप म विकसित करे के प्रयास करे जाही। पर्यटन ल बढ़ावा देहे बर राज्य के पांच शक्तिपीठ मन ल धार्मिक, पर्यटन के दृष्टि ले विकसित करे जाही। बस्तर क्षेत्र म लघु वनोपज प्रसंस्करण बर उद्योग मन के स्थापना करे जाही। सरगुजा क्षेत्र म उद्यानिकी अउ मछली पालन के संभावना मन ल प्रोत्साहित करे जाही। ए प्रकार समन्वित प्रयास करत ए क्षेत्र मन के आर्थिक संभावना मन ल मूर्त रूप दे जाही।
मुख्यमंत्री श्री विष्णु देव साय ह हर हमेसा कहिथें कि हमन अर्थव्यवस्था ल मजबूत बनाए के संकल्प लेहे हन। हमर लक्ष्य विकसित छत्तीसगढ़ बनाना हे। हम विकसित छत्तीसगढ़ के संकल्प ल पूरा करे बर बजट म तैयार करे गए रोडमैप के मुताबिक काम करबो। राज्य के अर्थव्यवस्था ल तेजी ले विकसित करे अऊ जादा विकास दर हासिल करे बर बजट म बहुत अकन प्रावधान करे गए हे, ए साल राज्य के बजट म पूंजीगत व्यय म बढ़ोतरी करे गए हे।