सड़क सुरक्षा महिला 2026 – जन-जागरूकता अभियान

सड़क दुर्घटना ल रोके बर चलत हे जन-जागरूकता अभियान, नियम पालन करैया मन के होवत हे सम्मान
रायपुर, छत्तीसगढ़ मा ‘सड़क सुरक्षा माह 2026’ के तहत सड़क दुर्घटना मन ल रोके बर जोर-शोर ले काम चलत हे। मुख्य सचिव अऊ पुलिस महानिदेशक के मार्गदर्शन मा पूरा प्रदेश मा रोज अलग-अलग जन-जागरूकता कार्यक्रम के आयोजन करे जावत हे।
मुख्यमंत्री श्री विष्णु देव साय अऊ परिवहन मंत्री श्री केदार कश्यप ह सड़क सुरक्षा बर पोस्टर अऊ फ्लैक्स जारी करे हें। उहें, उप मुख्यमंत्री श्री विजय शर्मा ह प्रदेश के सबो सरपंच अऊ पंच मन ले अपील करिन हे के वो मन अपन पंचायत क्षेत्र मा सड़क हादसा ल रोके खातिर आगू आवंय अऊ जरूरी पहल करंय। अभियान के शुरूआत 1 जनवरी के बेमेतरा मा हेलमेट रैली निकाल के करे गीस। अधिकारी मन के बैठक मा रायपुर, बिलासपुर अऊ दुर्ग जइसे जिला मन मा, जिहां जादा एक्सीडेंट होथे, उहां विशेष ध्यान देहे के निर्देश देहे गे हे।
साल 2025 मा सड़क दुर्घटना मा होवइया मऊत मा कमी आय हे। यातायात नियम तोड़इया मन ऊपर कड़ाई करत हुए लगभग 9 लाख मामला दर्ज करे गीस अऊ 39 करोड़ रूपिया जुर्माना वसूल करे गीस। एखर से मृत्यु दर मा करीब 3 प्रतिशत के गिरावट आय हे। अब साल 2026 मा मऊत के आंकड़ा ल कम से कम 10 प्रतिशत अऊ घटाए के लक्ष्य रखे गे हे।
यातायात पुलिस ह वाहन चलइया मन ल बिना हेलमेट, बिना सीट बेल्ट, मोबाइल मा बात करत या नशा करके गाड़ी झन चलाय बर समझाईश देवत हे। जउन लोगन नियम के पालन करत हें, पुलिस उंखर सम्मान घलो करत हे, ताकि बाकी लोगन ल घलो प्रेरणा मिल सके।