नई दिल्ली, बेंगलुरु के एक निजी स्कूल म एआइ तकनीक उपर आधारित रोबोट ल मास्टर के रूप म लगाए गए हे। ये रोबोट मनखे मन जइसे दिखथे। जेन ह न सिरिफ लइका मन ल पढ़ाथें भलुक उंखर सवाल के जवाब देके समस्या मन के हल तको निकालथे।
ये रोबोट सातवीं ले नौवीं क्लास के तीन सौ ले जादा लइका मन ल पांच अलग-अलग विसय पढ़ाथें। ए रोबोट ल मैडम जइसे बनाए गए हे। ईगल 2.0 नाम के ये रोबॉट ल 17 सदस्य मन के एक टीम ह बनाए हे। उमन बताथें कि एक रोबोट के लागत 8 लाख रूपिया आए हे।
खासतौर म तियार करे गए ये रोबोट मन पढ़ईया लइका मन ल बॉयोलॉजी, केमेस्ट्री, जियोग्राफी, हिस्ट्री अऊ फिजिक्स जइसे विसय पढ़ावत हें। रोबोट ल हल्का थ्री-डी प्रिंटेड मटेरियल अऊ स्मार्ट सर्वा मोटर ले तियार करे गए हे। इंकर मदद ले ये रोबोट कच्छा म पढ़ात खानी एकदम मनखे मन जइसे हाव-भाव देवत हें। हरेक रोबोट के वजन कुल 45 किग्रा हे। बताती के मुताबिक ए मन ल तियार करे म दू साल लगे हे।
बिदेस के एक ठन खबर के मुताबिक जापान के बौद्ध मंदिर मन म अइसनहे रोबोट मन ह प्रवचन तको देवत हें।