रोबोटिक सर्जरी छत्तीसगढ़ म चिकित्सा सुविधा मन के विकास म एक नवा आयाम : मुख्यमंत्री विष्णु देव साय

एम्स रायपुर म ‘देव हस्त’ रोबोटिक सर्जिकल सिसटम के मुख्यमंत्री ह करिन शुभारंभ
मुख्यमंत्री ह खुद करिन ‘देव हस्त’ म पहला ड्राई लैब डिसेक्शन
मरीज मन के परिजन मन बर एम्स रायपुर म बनही सर्व-सुविधायुक्त परिजन निवास : मुख्यमंत्री श्री साय
रायपुर, मुख्यमंत्री श्री विष्णु देव साय ह आज राजधानी रायपुर स्थित टाटीबंध म अखिल भारतीय आयुर्विज्ञान संस्थान (एम्स) म मध्य भारत के शासकीय स्वास्थ्य संस्थान मन के पहिली रोबोटिक सर्जिकल सिसटम ‘देव हस्त’ के शुभारंभ करिन। ए बेरा म उमन कहिन के “रोबोटिक सर्जरी छत्तीसगढ़ म चिकित्सा सुविधा मन के विकास म एक नवा आयाम हे। ये ऐतिहासिक क्षण प्रदेश के जनता ल अत्याधुनिक अऊ बेहतर उपचार उपलब्ध कराए के दिशा म मील के पत्थर साबित होही।”
मुख्यमंत्री श्री साय ह खुद ‘देव हस्त’ म पहला ड्राई लैब डिसेक्शन करके ए अत्याधुनिक तकनीक के औपचारिक शुरुआत करिन। ये सिसटम मध्य भारत के कोनो शासकीय स्वास्थ्य संस्थान म स्थापित होवइया पहला रोबोटिक सर्जिकल सिसटम हे।
मुख्यमंत्री श्री साय ह ए बेरा म एम्स रायपुर म छत्तीसगढ़ संग आन राज्य मन ले भर्ती होवइया मरीज मन के परिजन मन के रूके के सुविधा बर एम्स रायपुर म सर्व-सुविधायुक्त परिजन निवास निर्माण के घोषणा घलोक करिन।
मुख्यमंत्री ह कहिन के “डॉक्टर मन ल धरती म भगवान के रूप माने जाथे काबर के ओ मन हमला जीवन देथें। आज जेन रोबोटिक सर्जरी सिसटम के शुभारंभ होवत हे, ओला ‘देव हस्त’ नाव दे गए हे। एकर लाभ छत्तीसगढ़ संग एम्स रायपुर म भर्ती होवइया आन राज्य के मरीज मन ल घलोक मिलही। एम्स रायपुर उत्कृष्ट चिकित्सा सुविधा उपलब्ध कराए म सरलग मील के पत्थर साबित होवत हे।”
ए बेरा म मुख्यमंत्री श्री साय ह ‘देव हस्त’ के नामकरण बर आयोजित प्रतियोगिता के विजेता सुश्री ज्योत्स्ना किराडू ल पाँच हजार रूपिया के पुरस्कार राशि भेंट करिन। कार्यक्रम म एम्स रायपुर के निदेशक अऊ मुख्य कार्यकारी अधिकारी लेफ्टिनेंट जनरल (से.नि.) डॉ. अशोक जिंदल, विभागाध्यक्ष डॉ. देवज्योति मोहंती, बड़ संख्या म चिकित्सा छात्र अऊ गणमान्यजन उपस्थित रहिन।