– रोका छेका के क्रियान्वयन अऊ आन प्रमुख विषय मन के कलेक्टर ह लीन विस्तार ले जानकारी
दुर्ग, रोका छेका के अंतर्गत नगरीय निकाय अऊ ग्रामीण क्षेत्र मन म कार्रवाई चलत हे। नगरीय निकाय मन म साढ़े छै सौ ले जादा आवारा मवेशी मन ल हटाए गए हे। रोका छेका के क्रियान्वयन अऊ आन विषय मन ले संबंधित समीक्षा आज कलेक्टर श्री पुष्पेंद्र कुमार मीणा ह अधिकारी मन ले करिन। कलेक्टर ह कहिन कि शहरी क्षेत्र मन म सरलग आवारा मवेशी मन ल सड़क ले हटाए के काम निगम अमला करत हे। एखर से दुर्घटना मन के आशंका घटही। कलेक्टर ह कहिन कि अभी निगम क्षेत्र मन म अइसन मवेशी मन ल रखे के काम करे जात हे जेकर बर एक अलग जगह घलोक चिन्हांकित करे जा सकत हे। कलेक्टर ह कहिन कि जनदर्शन म घलोक कुछ कालोनी ले आवारा मवेशी मन ल लेके अइसन शिकायत आए हे। एकर उपर कार्रवाई करव अऊ यरलग एखर मानिटरिंग करत रहव। कलेक्टर ह कहिन कि ग्रामीण क्षेत्र मन बर घलोक रोकाछेका के आदेश शासन कोति ले देहे गए हे। जेखर अनुपालन म काम होवत हे। कलेक्टर ह कहिन कि जिला म कुछ दिन म गौमूत्र खरीदी घलोक सुरू होही। एखर खातिर घलोक इंफ्रास्ट्रक्चर तियार कर लेवव। उमन कहिन कि एनजीजीबी योजना के क्रियान्वयन म विशेष तौर म नजर रखव। कलेक्टर ह ये बेरा म जनदर्शन अऊ आन माध्यम ले आये मनखे मन के आवेदन मन के निराकरण के समीक्षा घलोक करिन। उमन कहिन कि सबो आवेदन मन के निराकरण समयसीमा म अऊ गुणवत्तापूर्वक होना चाही। उमन सबो विभाग मन के हर एक आवेदन ल सुनिन अऊ ये मा करे गए कार्रवाई के समीक्षा करिन। ये दौरान जिला पंचायत सीईओ श्री अश्विनी देवांगन, भिलाई आयुक्त श्री लोकेश चंद्राकर, दुर्ग आयुक्त श्री प्रकाश सर्वे संग आन अधिकारी उपस्थित रहिन।
स्वाधीनता दिवस के अवसर म हर घर झंडा बर मनखे मन ल करव प्रेरित– कलेक्टर ह कहिन कि स्वाधीनता दिवस के अवसर म मनखे मन ल अपन घर म तिरंगा फहराए बर कहव। उमन कहिन कि एखर अलावा प्रमुख सार्वजनिक जघा म घलोक झंडारोहण होवय। उमन कहिन कि स्वाधीनता दिवस ल लेके बड़का उछाह दुर्ग जिला म झलकना चाही। एखर बर निगम अऊ जनपद क्षेत्र मन म घलोक विशेष रूप ले प्रचार प्रसार करव।
कोविड ल लेके रखव सावधानी– कलेक्टर ह कहिन कि जिला म कोविड के केस तेजी ले बाढ़त हे। एला देखत अलर्ट मोड म रहना जरूरी हे। अभी करीबन पांच सौ ले जादा एक्टिव मरीज जिला म हे। टेस्टिंग के संख्या बढ़ाए गए हे। एखर संगेच कांटैक्ट ट्रैसिंग म घलोक नजर रखना हे। सबो अस्पताल मन म कोविड मरीज मन के इलाज बर जरूरी तैयारी होना चाही।
