राष्ट्रपिता महात्मा गांधी के स्वावलंबी गांव के सपना ल फलित करे के दिशा म लउहे बढ़त हे छत्तीसगढ़: श्री भूपेश बघेल

रायपुर, 01 जुलाई 2021। मुख्यमंत्री श्री भूपेश बघेल ह कहे हें कि छत्तीसगढ़ राष्ट्रपिता महात्मा गांधी के स्वावलंबी गांव के सपना ल साकार करे के दिशा म तेजी ले आगू बढ़त हे। नरवा, गरवा, घुरूवा, बाड़ी योजना के तहत गौठान मन म संचालित कई ठन आर्थिक गतिविधि जइसे महिला स्व सहायता समूह मन कोति ले वर्मी कम्पोस्ट के उत्पादन, बारी मन म सब्जी के उत्पादन संग आन आर्थिक गतिविधि मन ले महिला अऊ गांव म रहवईया मन ल रोजगार के संग आमदनी के जरिया मिले हे अऊ ओ मन स्वावलंबन कोति बढ़त हें। मुख्यमंत्री आज इहां अपन निवास कार्यालय म आयोजित वर्चुअल कार्यक्रम म खरीफ फसल ल खुले पशु मन के चरई ले बचे बर रोका-छेका अभियान के वर्चुअल शुभारंभ करे के बाद कार्यक्रम ल सम्बोधित करत रहिन। उमन कहिन कि गांव मन म बैठक करके रोका-छेका अभियान बर चरवाहा मन ल पशु ल एक जगह रोके अऊ ओ मन ल गौठान म सकेले के जिम्मेदारी देहे जाय। सबो गांव मन म एक संग रोका-छेका करे जाए, जेखर से फसल ल नुकसान झन होवय।