मुख्यमंत्री ह गुरूजी मन ल लिखिन चिट्ठी
रायपुर, 02 अप्रेल 2020। मुख्यमंत्री श्री भूपेश बघेल ह गुरूजी मन ले कहे हें के अभी हाल म कोरोना (कोविड-19) के सेती देश अऊ समाज खतरा म हे। ये संकट के घड़ी मां हम सब ल सक्रिय रहके ये बीमारी ल दूर भगाना हे अऊ हमार गांव, परिवार अऊ समाज ल स्वस्थ्य अऊ सुरक्षित रखना हे। उमन गुरूजी मन ले अपील करे हें के कोरोना के संक्रमण ले बचाव बर सबले कारगर उपाय सामाजिक दूरी बनाए रखे के संगेच हाथ के स्वच्छता बनाए रखना घलोक हे, एकर अनिवार्य रूप ले पालन कराए म सक्रिय भूमिका अदा करव।
मुख्यमंत्री ह गुरूजी मन ल चिट्ठी लिखके कहिन हे के गुरूजन लइका मन ल शिक्षा देहे के संगेच ऊंखर परिवार मन ले घलोक प्रत्यक्ष-परोक्ष रूप ले जुड़े रहिथें। सबो लइका मन बर नैतिक शिक्षा अऊ ज्ञान के स्त्रोत आपे मन हौ। आप मन के समझाईश अऊ लइका मन ल देहे मार्गदर्शन ले पूरा परिवार प्रभावित होथे। एक प्रकार ले आप मन पथ प्रदर्शक के काम करथौ। शिक्षक ल भगवान ले घलोक उपर के दर्जा प्राप्त हे।
मुख्यमंत्री ह कहे हें के कोरोना वायरस के सेती उत्पन्न अभी हाल संकट के रोकथाम म आप मन के सक्रिय भूमिका होना चाही। आप मन शिष्य मन के माध्यम ले या परिवार के संग निजी चर्चा म कोरोना के रोकथाम बर जरूर ये संदेश देवव के सबो मनखे घर के भीतर ही रहयं, सामाजिक दूरी के पालन करयं अऊ बेरा-बेरा म हाथ धोत रहयं। उमन कहिन के मध्यान्ह भोजन के प्रतिपूर्ति के रूप म शाला मन ले सूखा राशन के वितरण करे के निर्देश हे। शाला स्तर म सूखा राशन वितरण बर उचित प्रक्रिया अपनाए के जरूरत हे ताकि सामाजिक दूरी के पालन होवय, स्वच्छता के पालन होवय अऊ सबो पात्र लइका मन ल अनिवार्य रूप ले सूखा राशन के रूप म मध्यान्ह भोजन मिल सकय।
मुख्यमंत्री ह कहिन के गुरूजी मन ल ये घलोक देखना हे के आप मन के तीर-तखार के कोनो मनखे म कोरोना के प्रारंभिक लक्षण तो नइ हे, कोनो स्थल म भीड़-भाड़ झन होवय अऊ शासन के निर्देश के उल्लंघन नइ करे जाए। कहूं अइसन होवत हे त जिला प्रशासन के सक्षम अधिकारी अउ स्थानीय स्थास्थ्य अधिकारी ल जरूर सूचना देवव। आप मन के सहयोग ले छत्तीसगढ़ म कोरोना वायरस के संक्रमण ल रोके म मदद मिलही अऊ छत्तीसगढ़ ल स्वस्थ्य बनाए रखना संभव हो सकही।
