रेलवे पुलिस ह रेल म बैग चोरइया आरोपी मन ल करिस गिरफ्तार

रायपुर, रेलवे पुलिस ह एक महिला यात्री ले चोरी करे गए मोबाइल अऊ नगद रुपिया के संग आरोपी ल गिरफ्तार करे हे। मंडल टास्क टीम रेलवे सुरक्षा बल रायपुर, आरपीएफ रेलवे पोस्ट रायपुर अऊ जीआरपी ह संघरा कारवाई करे रहिस। 30 अगस्त के मंडल सुरक्षा आयुक्त आरपीएफ रायपुर के मार्गदर्शन म जांच करे गीस। रेलवे स्टेशन रायपुर म जांच के समय एक संदिग्ध मनखे ल प्लेटफार्म 5 अऊ 6 म बिलासपुर छोर तीर घेराबंदी करके पकड़े गीस। पूछताछ करे म पता चलिस के वो मंगल कल्यारी उर्फ लक्की (25 वर्ष) ये, अभी वोकर हाल पता वाल्मिकी नगर अंबेडकर ग़ह कबीर नगर रायपुर के निवासी हे। वोकर स्थाई पता न्यू कलीम नगर, पेट्रोल पंप तीर शुक्रवारी बाजार गुढियारी हे।
आरोपी ह स्वीकार करिस कि 20-22 दिन पहिली रेलवे स्टेशन रायपुर म खड़े गाड़ी संख्या 02974 पुरी-गांधीधाम एक्सप्रेस के कोच संख्या एस/07 ले एक महिला यात्री के लेडिस हेंड बैग चोरी करे रहिस। बैग म नगद 28 हजार अऊ एक मोबाइल कीमती 11 हजार रुपिया रहिस। आरोपी के निवास वाल्मीकि नगर ले नगदी 8 हजार अऊ चोरी होए मोबाइल जब्त करे गीस। आरोपी ह चोरी के बाकी पइसा के जुआ खेलके अऊ दारू पीके खर्च करना बताइस। आरोपी ल जीआरपी थाना रायपुर लाए गीस। इहां 8 अगस्त के दर्ज धारा 379 आईपीसी के मामला म कार्रवाई करके 30 अगस्त के न्यायालय रायपुर के आगू पेश करे गीस।