- गोबर विक्रेता मन ल आठ करोड़ रूपिया के होइस ऑनलाईन भुगतान
- गोधन न्याय योजना के तहत अब तक 20.72 करोड़ रूपिया हितग्राही मन के खाता म अंतरित
रायपुर, 25 सितंबर 2020। मुख्यमंत्री श्री भूपेश बघेल ह आज वीडियों कॉन्फ्रेसिंग के माध्यम ले गोधन न्याय योजना के तहत प्रदेश के 83 हजार 809 गौपालक अऊ गोबर विक्रेता मन ल चउथइया किश्त के रूप म 8 करोड 02 लाख रूपिया के राशि के आनलाइन भुगतान सीधा संबंधित मन के खाता म करिन। चउथइया किश्त के ये राशि एक सितंबर ले 15 सितंबर तक राज्य के 3122 गौठान मन म क्रय करे गए 4 लाख एक हजार 475 क्विंटल गोबर के खरीदी के एवज म करे गीस। ये योजना के तहत अबतक कुल 20 करोड़ 72 लाख रूपिया के भुगतान करे जा चुके हे। योजना के सबले जादा लाभ प्रदेश के गरीब, भूमिहीन अऊ गौ-पालक मन ल मिलत हे।
मुख्यमंत्री श्री भूपेश बघेल ह ये बेरा म अपन उद्बोधन म कहिन के प्रदेश सरकार अपन वादा ल पूरा करत हे। किसान, गरीब अऊ मजदूर मन के हित के संरक्षण हमर प्रतिबद्धता हे। उमन कहिन के हमन कर्ज माफी ले लेके धान खरीदी, सिंचाई कर ले माफी, बिजली बिल ल हाफ करे के वादा ल पूरा करे के संगेच राज्य के किसान अऊ गरीब तबके के मनखे मन के बेहतरी बर बहुत अकन अभिनव योजना शुरू करे हन। राजीव गांधी किसान योजना अऊ गोधन न्याय योजना के संग किसान मन अऊ गांव वाले मन के आर्थिक स्थिति ल बेहतर बनाए के प्रयास करे जात हे। मुख्यमंत्री ह ये मौका म केन्द्र सरकार के कृषि ले संबंधित तीन अध्यादेश मन के उल्लेख करत कहिन के ये तीनों कानून किसान अऊ आम मनखे मन के हित म नइ हे। एखर से किसान, कृषि मजदूर के संगें-संग आम मनखे मन के घलोक आजीविका प्रभावित होही। जमाखोरी, कान्टेक्ट फार्मिंग अऊ निजी मंडी के व्यवस्था शुरू होए ले बहुत बड़ नुकसान होही।
मुख्यमंत्री ह कहिन के गोधन न्याय योजना के तहत हितग्राही मन ल 15-15 दिन म राशि भुगतान के वादा ल सरकार पूरा करत हे। अब तक 20 करोड़ 72 लाख रूपिया के राशि बीते चार पंद्रही म क्रय करे गए गोबर के एवज म देहे गे हे। एखर से गरीब गांव वाले मन अऊ पशुपालक मन ल आर्थिक लाभ मिलत हे। मुख्यमंत्री ह कहिन के अभी हाल समय म गौठान मन म तीस हजार क्विंटल वर्मी कंपोस्ट खाद के उत्पादन होय हे, अवइया समय म एखर मात्रा म अऊ बढ़ोत्तरी होही। वर्मी खाद के विपणन के व्यवस्था घलोक करे जाही। उमन कहिन के सबो ग्राम पंचायत मन म गौठान निर्माण के लक्ष्य अऊ सबो गौठान मन म गोबर खरीदी होवय, एखर व्यवस्था करे जाही।
ये मौका म कृषि मंत्री श्री रविन्द्र चौबे ह कहिन के मुख्यमंत्री श्री भूपेश बघेल के सियानी म छत्तीसगढ़ राज्य के किसान मन के बेहतरी के काम करे के मामला म देश के मॉडल राज्य हे। प्रदेश सरकार किसान मन के संग हे। गोधन न्याय योजना ल उमन देश के अभिनव योजना बतात कहिन के एखर जरिए हमन समाज के गरीब तबका के संगें-संग पशुपालक मन ल आर्थिक रूप ले मदद पहुंचाए के काम करे हन। गौठान मन म क्रय करे जात गोबर ले वर्मी खाद के निर्माण करे जात हे। छत्तीसगढ़ राज्य जैविक खेती के दिशा म आगू बढ़त हे। कार्यक्रम के सुरू म कृषि उत्पादन आयुक्त डॉ. एम. गीता ह पावर पाइंट प्रजेंटेशन के माध्यम ले गोधन न्याय योजना के बारे म विस्तार ले जानकारी दीन।
ये बेरा म मुख्यमंत्री के सलाहकार द्वय श्री राजेश तिवारी अऊ श्री रूचिर गर्ग, मुख्य सचिव श्री आर.पी.मंडल, मुख्यमंत्री के अपर मुख्य सचिव श्री सुब्रत साहू, मुख्यमंत्री के सचिव श्री सिद्धार्थ कोमल परेदशी, सचिव सहकारिता श्री आर. प्रसन्ना, संचालक कृषि श्री नीलेश क्षीरसागर, उप सचिव सुश्री सौम्या चौरसिया संग आन वरिष्ठ प्रशासनिक अधिकारी उपस्थित रहिन।
