20 करोड़ के लागत ले बनही भव्य रुद्रेश्वर धाम कॉरिडोर
धमतरी, सहर ले लगे रुद्री म स्थित जुन्ना रुद्रेश्वर महादेव मंदिर अब सिरिफ एक ठन धार्मिक सुघर जगा भर नो हे, भलुक अवइया बेरा म एहा राज्य के सांस्कृतिक चिन्हारी अउ धार्मिक पर्यटन के नवा केंद्र बनके आगू आही। लगभग 20 करोड़ रुपिया के लागत ले तय करे गे रुद्रेश्वर धाम कॉरिडोर परियोजना के माध्यम ले मंदिर परिसर के पूरा विकास करे जाही। ए बड़े विकास काम ला भारत सरकार के संस्कृति अउ पर्यटन मंत्रालय के सहयोग ले तीन चरण म विकास करे के योजना तइयार करे गए हे।
बड़का बात ए हे के पूरा विकास काम म मंदिर के असली बनावट अउ ओकर आध्यात्मिक मान-मर्यादा ला जइसे के तइसे रखे जाही। बिना कोनो बड़े तोर-फोर या बनावट के नुकसान के मंदिर परिसर ला आधुनिक सुविधा अउ पारंपरिक भारतीय स्थापत्य कला के मेल-जोल ले नवा स्वरूप देहे जाही। सोचे गे डिजाइन म शिखर, त्रिशूल, ओम् चिनहा, तोरण दुआर, नक्कासीदार खंभा, नंदी बाबा के मूरती, दीप खंभा अउ जालीदार काम जइसे जुन्ना चीज मन ला सामिल करे गए हे। कुदरती सैंडस्टोन क्लैडिंग अउ पत्थर वाले फिनिश ले मंदिर परिसर ह भव्य, सुग्घर अउ कभू नइ मिटे वाला रूप म दिखही।
ए परियोजना के मतलब सिरिफ मंदिर ला सुग्घर बनाना भर नइ हे, भलुक अवइया सैलानी मन ला दुनिया भर के सुविधा देना घलो हे। एकर तहत चउड़ा पैदल मार्ग, सुघर ब्यवस्था वाले दुआर, परिक्रमा पथ, घाट, मंडप अउ जनता के उपयोग के जगा मन के बढ़िया ढंग ले विकास करे जाही। परिसर म डिजिटल जानकारी स्क्रीन, प्रसाद अउ स्मृति चिन्ह के दुकान मन, फूड कोर्ट, सुस्ताय के जगह, लइका मन ला दूध पियाय के कमरा, साफ-सुथरा शौचालय अउ प्राथमिक स्वास्थ्य केंद्र जइसे सुविधा तइयार करे जाही। आधुनिक तकनीक के उपयोग करत एआई आधारित हेल्थ चेकअप कियोस्क घलो लगाय जाही। सियान मन अउ दिव्यांग जन मन बर रैम्प वाले बिना बाधा के आए-जाए के ब्यवस्था ए परियोजना के बड़का हिस्सा होही।
कलेक्टर श्री अविनाश मिश्रा के कहे मुताबिक ए परियोजना सिरिफ बनावट के काम नो हे, भलुक धमतरी के धार्मिक आसा, सांस्कृतिक धरोहर अउ पर्यटन के संभवाना मन ला नवा चिन्हारी देवाए के उदीम आय। अवइया समे म रुद्रेश्वर धाम ह राज्य के बड़े आध्यात्मिक अउ सांस्कृतिक पर्यटन केंद्र मन म सामिल होही।