प्रधानमंत्री आवास के नाम म नियम विरूद्ध काम करे म होही कड़क कार्रवाई : प्रभारी मंत्री श्री जायसवाल

गौरेला पेंड्रा मरवाही, जिला के प्रभारी मंत्री अउ राज्य के स्वास्थ्य मंत्री श्री श्यामबिहारी जायसवाल के मुख्य आतिथ्य म आज मरवाही विकासखण्ड के ग्राम पंचायत डोंगरिया के शाला मैदान म जिला स्तरीय आवास मेला के आयोजन करे गीस। मेला म नवा स्वीकृत आवास के भूमि पूजन अउ जिनकर घर पूरा हो गए वइसन हितग्राही मन के सांकेतिक गृह प्रवेश के संग घर अउ चाबी के डेमो सौंपे गीस। प्रभारी मंत्री ह अपन संबोधन म कहिन के गरीब मन के पक्का मकान के सपना ल प्रधानमंत्री श्री नरेन्द्र मोदी अऊ मुख्यमंत्री श्री विष्णुदेव साय पूरा करत हे। मुख्यमंत्री बनतेच श्री साय ह प्रदेश के 18 लाख मनखे मन के पक्का मकान पास करिस। वो ह कहिस के हमर सरकार गांव, गरीब अऊ किसान के विकास बर सरलग काम करत हे।
प्रभारी मंत्री श्री जायसवाल ह कहिन के प्रधानमंत्री आवास योजना के नाम म जेन नियम मन के विरूद्ध काम करही ओखर खिलाफ सख्त कार्रवाई करे जाही। उमन सबो हितग्राही मन ले घर पास करवाए के नाम म राशि के मांग करे म तुरंत एखर सूचना कलेक्टर, एसपी ल देहे ल कहिन। उमन कहिन के पीएम जनमन योजना के तहत घर बर एको बैगा परिवार नइ छूटना चाही। एखर बर सर्वे कराके सबो बैगा परिवार ल पक्का मकान स्वीकृत करे खातिर उमन कलेक्टर ल निर्देश दीन। संगेच पीएम किसान सम्मान निधि के तहत अभियान चलाके सत्प्रतिशत किसान मन ल लाभान्वित करे बर निर्देश दीन। उमन भूमिधारक सबो किसान मन के पट्टा बनाए अऊ केवाईसी कराके किसान सम्मान निधि ले लाभान्वित कराए ल कहिन। संगे वन अधिकार पट्टाधारी किसान मन ले धान खरीदी बर 10 दिन के भीतर पंजीयन कराए बर वनमण्डलाधिकारी ल घलोक निर्देश दीन।