कवर्धा, 23 मार्च 2020। कोरोना वायरस (कोविड-19) ल लेके सोशल मीडिया म अफवाह फैलाय म दू मनखे मन के खिलाफ कार्रवाई कर के जेल भेज देहे गए हे। वाट्स एप म कोरोना पीड़ित होए के भरमाए वाला जानकारी फैलाय म दू टूरा मन ल गिरफ्तार कर के जेल भेज देहे गए हे। एसपी ह जनता ले अपील करे हें के सोशल मीडिया म अफवाह झन फैलावव, कहूं नइ मानहू त कार्रवाई करे जाही।
जानबा हे के इतवार के दुल्लापुर रानी के रहइया डीकेश सत्यवंशी ह वाट्स एप के माध्यम ले छांटा गांव के दू मनखे मन ल कोरोना ले पीड़ित बताके अस्पताल म भर्ती होए के भरमाए वाला जानकारी शेयर करे रहिस। उहें छोटूपारा के रहइया दुर्गेश साहू ह वाट्स एप ले पंडरिया म कोरोना वायरस के संदिग्ध मरीज मिले अउ अस्पताल म आइसोलेशन होए अऊ हड़कंप मचे के भरमाए वाला जानकारी फैलाए रहिस। ए जानकारी पुलिस ल जइसे लगिस, तुरते दुनों आरोपी के खिलाफ भादवि अउ महामारी अधिनिमय के तहत कार्रवाई करत गिरफ्तार करके ज्यूडिसियल रिमांड म जेल भेज देहे गीस।
पुलिस अधीक्षक डॉं. लाल उमेद सिंह ह आम जनता ले अपील करत कहे हें के सोशल मीडिया के माध्यम ले कोरोना वायरस के संबंध म भरमाए वाला प्रचार-प्रसार झन करव। कहूं कोनो ह सोशल मीडिया के माध्यम ले असन भरमाए वाला प्रचार-प्रसार करत पाए जाही त वैधानिक कार्रवाई करे जाही।