ग्रामीण औद्योगिक पार्क के माध्यम ले गांधी जी के सुराज के सपना छत्तीसगढ़ म होवत हे साकार

कांकेर, गांधी जी के सुराज के सपना रहिस आत्मनिर्भर अऊ तेजी ले बढ़त ग्रामीण औद्योगिक ईकाई। कांकेर जिला के पहिली ग्रामीण औद्योगिक पार्क, गांधी ग्राम कुलगांव ल देखके महसूस होवत हे कि हम गांधी जी के सपना ल पूरा करे के दिशा म सफल होवत हन। ये बात मुख्यमंत्री श्री भूपेश बघेल ह गांधी ग्राम कुलगांव के लोकार्पण के अवसर म कहीन। मुख्यमंत्री ह कहिन कि गौठान मन ल हमन रोजगार के ठौर के रूप म विकसित करे के निर्देश दे रहेन ताकि बड़का ग्रामीण आबादी ल कई ठन रोजगारमूलक गतिविधि मन ले जोड़े जा सकय। ये काम कतका उपयोगी हो सके हे अऊ एखर से मनखे मन बर कतका बड़का पैमाना म आर्थिक अवसर पैदा करे जा सके हे गांधी ग्राम कुलगांव एकर सुंदर उदाहरण हे।
ये मौका म मुख्यमंत्री ह महात्मा गांधी के प्रतिमा के माल्यार्पण करे के बाद केंद्र के निरीक्षण करिन। उमन ढेंकी ले चावल निकानि। मुख्यमंत्री ह कहिन कि ये हमर सुंदर परंपरा हे अऊ एखर से धान के गुणवत्ता घलोक सुरक्षित रहिथे। उमन कई स्वसहायता समूह मन कोति ले करे जात रोजगारमूलक गतिविधि मन के निरीक्षण करिन। ये मौका म विधानसभा उपाध्यक्ष श्री मनोज मंडावी, महिला अउ बाल विकास मंत्री श्रीमती अनिला भेंड़िया, संसदीय सचिव श्री शिशुपाल सोरी, मुख्यमंत्री के सलाहकार श्री राजेश तिवारी अउ आन जनप्रतिनिधि उपस्थित रहिन।