40 हजार मास्क अऊ 4 हजार साबुन तियार
रायपुर, 28 अप्रैल 2020। मास्क अऊ साबुन बनाके ग्रामीण महिला मन न सिरिफ अपन परिवार बर अकतहा रूपिया कमावत हें, भलुक लॉकडाउन अवधि म समाज ल कोरोना संक्रमण ले बचाय अऊ रोकथाम म सहयोग तको करत हें। समूह के महिला मन ए बेरा म अपन सामाजिक दायित्व के संग परोपकार के भावना ले जुड़के योगदान देवत हें।
राष्ट्रीय ग्रामीण आजीविका मिशन अंतर्गत नारायणपुर जिला म कई महिला स्व-सहायता समूह मन मास्क, साबुन अउ आन समान जिला प्रशासन ल उपलब्ध करवात हें। अभी तक इमन 40 हजार मास्क अऊ चार हजार साबुन तियार कर डरे हें। समूह के बनाय मास्क अऊ साबुन जिला प्रशासन, ग्राम पंचायत, स्वास्थ्य विभाग, नगर पालिका, महिला बाल विकास विभाग के माध्यम ले ग्रामीण परिवार तक पहुंचाएं जात हे। ये समान मन के बिक्री ले समूह के महिला मन ल बने आमदनी घलोक मिलत हे।
जिला प्रशासन ह घलोक महिला समूह मन ल सरलग पंदोली देवत हे। मास्क बनाए बर सस्ता कीमत म सूती कपड़ा अऊ साबुन बनाए बर जरूरी सामान समूह ल उपलब्ध कराए जात हे। एखर अलावा समूह मन के बनाए मास्क अऊ साबुन के बिक्री म घलोक सहयोग देहे जात हे।