पाटन, मुख्यमंत्री ह पदयात्रा के बेरा म शोभाराम पटेल ले हाल-चाल पूछिन, कहिन कि अभी भउजी के तबियत कइसे हे। वो बताइस कि अभी ओला बने लागत हे। जैतखंभ तीर दिव्यांग प्रसेन सिरमौर ह घलोक मुख्यमंत्री के अभिवादन करिस। श्री सिरमौर ह बताइस कि ओ ह घलोक पदयात्रा के स्वागत करे आये हे। आज इहां बहुत अच्छा लागत हे।
व्यावसायिक प्रतिष्ठान मन के संचालक मन ले घलोक उमन बात करिन। एक पंप बेचइया ह बताइस कि कर्जमाफी ले किसान मन के हिम्मत बहुत बाढ़े हे अऊ हम मनखे मन के ये साल शानदार व्यवसाय होए हे। मुख्यमंत्री ह मनखे मन ले शासकीय योजना मन के जमीनी स्थिति के जानकारी घलोक लीन। उमन पूछिन कि बिजली बिल हाफ होए हे कि नहीं, महिला मन ह बताइन कि हां, एखर से बिक्कट राहत मिले हे। ए बेरा म मुख्यमंत्री ह एक छोटे से लइका शिवम देवांगन ल एके हाथ ले उठा लीन अऊ ओला दुलारिन। एकर पाछू लइका मन के एक समूह ल उमन पूछिन कि तुमन के पढ़ाई कइसे चलत हे।
