किसान मन ल आर्थिक रूप ले सबल बनाना सरकार के लक्ष्य : श्री चौबे

कृषि मंत्री नारायणपुर म आयोजित किसान मेला म होइन सामिल
रायपुर, 15 फरवरी 2020। कृषि मंत्री श्री रविन्द्र चौबे ह आज जिला नारायणपुर म आयोजित किसान मेला अउ कृषि प्रदर्शनी कार्यक्रम म सामिल होइन। मंत्री श्री चौबे ह किसान मन ल संबोधित करत कहिन कि किसान मेला आयोजित करे के मुख्य उद्देश्य किसान मन ल बाहिर के तकनीक के बारे म अवगत करवाना अऊ कृषि म होवत नवा-नवा बदलाव मन के जानकारी देना हे। किसान मेला ह आप मन ल नवा तकनीक के संग जोड़ सकत हे अऊ नवा-नवा उपकरण मन के बारे म आप जान सकत हव। उमन कहिन कि हमर सरकार के मुख्य लक्ष्य प्रदेश के किसान मन ल आर्थिक रूप ले सबल बनाना हे। उमन कहिन कि इहां के मेहनतकश किसान मन ल देखके लागथे कि ये क्षेत्र के किसान मन के संग मिलके कृषि के क्षेत्र म बहुत कुछ करे जा सकत हे। रामकृष्ण मिशन आश्रम वाले खेल मैदान म आयोजित किसान मेला म श्री चौबे ह प्रदर्शनी के अवलोकन घलोक करिन।