रइपुर, 08 मई 2021 शनिच्चर। मुख्यमंत्री दाउ भूपेश बघेल आज राजधानी के अपन घरू कार्यालय म आयोजित आभासीय बइठका म विधानसभा अध्यक्ष अउ मंत्री मन संग जादा संक्रमित 11 जिला के अधिकारी संग करत कोरोना संक्रमण के स्थिति के बारे म फरिहा केे समीक्षा करीन । उन मन कहीन कि राज्य में वर्तमान में कोरोना संक्रमण ल धियान म रखके शादी-बिहाव अउ दशगात्र कार्यक्रम म 10-10 लोगन ल संघरे के अनुमति देहे जावत हे। सबो कलेक्टर अउ पुलिस अधीक्षक ये सुनिश्चित करैं कि एमा निर्धारित संख्या ले जादा लोगन झन संघरैं। अपन-अपन जिला म होवइया ये कार्यक्रम मन म कड़क निगरानी रखैैं। संग म कार्यक्रम मन म कोविड अनुकूल बेवहार के कड़ई ले पालन होेवय। एकर बर अपन क्षेत्र के समाज प्रमुख मन संग बइठका करके समझावयं। सरपंच, पटवारी, शिक्षक, रोजगार सहायक अउ कोटवार आदि स्थानीय करमचारी के माध्यम ले गांव म कड़क निगरानी रखे बर काहय।
मुख्यमंत्री दाउ बघेल ह चर्चा म राज्य के मेड़ो पार ले लगेे क्षेेत्र अउ अंतर्राज्यीय मेेड़ो, खदान अउ फैक्ट्री मन म बाहिर ले अवइया अउ होम आइसोलेशन म रहइया मरीज मन ल तको कोविड-19 के नियम के कड़ई लेे पालन कराए बर कहीन। होम आइसोलेशन म रहइया मनखे घरे म अलग रहैं,एकर विशेष धियान रखैं। कोरोना संक्रमित मनखे के पूरा परिवार कोरोना के दवा तुरते उपलब्ध करावयं।
मुख्यमंत्री दाउ बघेल ह कहीन कि कोरोना ले बचाव बर टीकाकरण महत्वपूर्ण हे। एला धियान म रखत सबो कलेक्टर अपन-अपन जिला म टीकाकरण बर लोगन ल जादा ले जादा प्रेरित करैं । राज्य म लॉकडाउन म लोगन ल कोनो दिक्कत झन होवय,एकर बर पीडीएस के तहत मई अउ जून महीना के राशन ल लउहे निःशुल्क बंटवावय। सुरक्षा बर राज्य के सबो आंगनबाड़ी कार्यकर्ता मन ल तको सेनेटाइजर अउ मास्क महिला अउ बाल विकास विभाग के माध्यम उपलब्ध करावयं।
बइठका म विधानसभा अध्यक्ष डॉ. चरणदास महंत के संगे संंग स्वास्थ्य मंत्री श्री टी.एस. सिंहदेव, गृह मंत्री श्री ताम्रध्वज साहू, कृषि मंत्री श्री रविन्द्र चौबे, वन मंत्री श्री मोहम्मद अकबर, स्कूल शिक्षा मंत्री डॉ. प्रेमसाय सिंह टेकाम, नगरीय प्रशासन मंत्री डॉ. शिवकुमार डहरिया, खाद्य मंत्री श्री अमरजीत भगत, महिला एवं बाल विकास मंत्री श्रीमती अनिला भेंड़िया, उद्योग मंत्री श्री कवासी लखमा, राजस्व मंत्री श्री जयसिंह अग्रवाल, उच्च शिक्षा मंत्री श्री उमेश पटेल अउ लोक स्वास्थ्य यांत्रिकी मंत्री गुरू रूद्रकुमार ह वीडियो कांफ्रेंसिंग ले भाग लीन अउ अपन— अपन आवश्यक सुझाव दीन। एमा मुख्य सचिव श्री अमिताभ जैन, अपर मुख्य सचिव श्री सुब्रत साहू, प्रमुख सचिव स्वास्थ्य डॉ. आलोक शुक्ला अउ मुख्यमंत्री के सचिव श्री सिद्धार्थ कोमल सिंह परदेशी तको संंघरीन ।
