- मंत्री श्री ताम्रध्वज साहू ह करिन लोक निर्माण विभाग के काम-काज के समीक्षा
- सड़क मन के मरम्मत अऊ निर्माण कार्य मन म तेजी लाय के निर्देश
- सबो जिला मन म इंडोर स्टेडियम बनाए प्राक्कलन तियार करे के निर्देश
रायपुर, लोक निर्माण मंत्री श्री ताम्रध्वज साहू ह आज सिविल लाइन के नवीन थिरावन भवन के सभाकक्ष म लोक निर्माण विभाग के कार्यपालन अभियंता मन के राज्य स्तरीय समीक्षा बैठक लीन। उमन संभागवार सड़क मन के संधारण अउ वार्षिक बजट म सामिल सड़क अऊ पूल मन के प्राक्कलन के स्थिति के समीक्षा करिन। उमन सड़क मन के मरम्मत अऊ निर्माण कार्य मन म गति लाय के निर्देश दीन। उमन मुख्य रूप ले प्रदेश के सबो सड़क मन के गड्ढा मन के जरूरी मरम्मत बने सहिन अउ लउहे करे अऊ बजट म सामिल काम मन के प्राक्कलन ए महीना के 31 तारीक तक प्रस्तुत करे के निर्देश दीन। बैठक म बताए गीस कि प्रदेश म करीबन 6000 किलोमीटर लंबाई के सड़क अभी हाल म परफॉर्मेंस गारंटी म हे। ए जानकारी म मंत्री ह कड़क रूख अपनात कहिन कि परफॉर्मेंस गारंटी के अंतर्गत अवइया सड़क मन के निरीक्षण तुरंते करव अऊ ये तय करव कि कहूं ए सड़क मन म कोनो क्षति हो गए हे त ऊंखर मरम्मत के काम संबंधित ठेकेदार मन ले ओकरे पइसा ले करवावव। एखरे संगेच उमन प्रदेश म होवइया निर्माण कार्य मन के गुणवत्ता नियंत्रण बर एक निरीक्षण दल के गठन करे के निर्देश दीन, जऊन निर्माण कार्य मन के आकस्मिक निरीक्षण करे के बाद विस्तृत प्रतिवेदन शासन ल प्रस्तुत करही। उमन कहिन कि निर्माण कार्य मन म लापरवाही बर विभागीय अधिकारी मन के जिम्मेदारी तय करे जाही।
श्री साहू ह कार्यपालन अभियंता स्तर म 20 लाख रूपिया तक के काम सामान्य निविदा ले करे अऊ पंजीकृत बेरोजगार इंजीनियर मन ल काम देहे के निर्देश दीन। उमन सबो कार्यपालन अभियंता मन ल जिला स्तर म नियमित बैठक लेहे अऊ विभागीय काम अउ उपलब्धि मन के प्रचार-प्रसार म जोर दीन ताकि विभाग के महत्वपूर्ण कार्य मन के जानकारी आम नागरिक मन तक पहुंच सकय। उमन आय के स्त्रोत बढ़ाए बर खाली पड़े शासकीय जमीन ल व्यवसायिक बनाए बर घलोक कार्ययोजना बनाए के निर्देश दीन। श्री साहू ह सबो जिला मन म इंडोर स्टेडियम बनाए के कार्ययोजना उपर चर्चा करिन अऊ स्टेडियम बर घलोक प्राक्कलन तियार करे के निर्देश दीन।
बैठक म अपर मुख्य सचिव लोक निर्माण श्री अमिताभ जैन ह सड़क सुरक्षा के संबंध म जरूरी निर्देश दीन। उमन सड़क मन के मरम्मत अउ संधारण बर मैदानी अधिकारी मन के व्यक्तिगत जिम्मेदारी तय करत सड़क मन म होए गड्ढ़ा मन के समतलीकरण, गति अवरोधक आदि के निर्देश दीन। बैठक म विशेष कर्तव्यस्थ अधिकारी श्री अनिल राय, प्रमुख अभियंता श्री डी.के.अग्रवाल संग सबो मुख्य अभियंता, अधीक्षण अभियंता, कार्यपालन अभियंता अउ परियोजना निदेशक ए.डी.बी. प्रोजेक्ट उपस्थित रहिन।
