बलौदाबाजार के जिला अस्पताल म 9 महीना म होइस 462 सिजेरियन संग 1 हजार 800 ले जादा प्रसव
बलौदाबाजार, मुख्यमंत्री श्री विष्णु देव साय के मार्गदर्शन म स्वास्थ्य सुविधा अउ संसाधन मन म सरलग इजाफा होवत हे। स्वास्थ्य मंत्री श्री श्याम बिहारी जायसवाल के निर्देश म स्वास्थ्य व्यवस्था ल बेहतर बनाए के प्रयास सतत रूप ले जारी हे। इही कड़ी म बलौदाबाजार म कलेक्टर श्री दीपक सोनी के मार्गदर्शन म जिला म स्वास्थ्य सुविधा मन के विशेष ध्यान रखे जात हे। जिला अस्पताल बलौदाबाजार म ए साल जनवरी 2024 ले महिना सितंबर तक 9 महिना म कुल 1816 सफल प्रसव कराए गे हे। ओ प्रसव म ले 1354 सामान्य प्रसव अउ 462 सिजेरियन सामिल हे। सिजेरियन म आकस्मिक अऊ पूर्व नियोजित दुनों ही सम्मिलित हे।
जिला अस्पताल बलौदाबाजार के सिविल सर्जन डॉक्टर के. के. टेम्भूरने ह बताइस के अस्पताल म तीन स्त्री रोग खांटी जानकार के संग कुशल प्रशिक्षित नर्सिंग स्टाफ अपन सेवा देवत हें। इहां आधुनिक सुविधा सहित प्रसव कक्ष स्थापित हे। प्रसव के बाद नवजात शिशु के देखभाल बर विशेष एस.एन.से.यू. घलोक स्थापित हे। ओ कुल प्रसव म 161 लइका मन ल ओ एस.एन.सी.यू. म भर्ती करके उंखर विशेष देखभाल घलोक करे गीस।
ग्राम खैरा ले महिना सितंबर म अपन 23 वर्षीय पत्नी ल प्रसव पीड़ा म जिला अस्पताल लेके आए नोहर पटेल ह बताइस के अस्पताल म आए म वोला बताए गीस के फीटल डिस्ट्रेस के स्थिति हे जेमां भ्रुण तक ऑक्सीजन पहुँचे म दिक्कत होथे अऊ लइका के धड़कन बढ़ जाथे। अइसन म ऑपेरशन के माध्यम ले प्रसव होइस जेमां मां अऊ लइका दुनों ही स्वस्थ हे। अइसनहे प्रोलांग लेबर (देर तक प्रसव पीड़ा) के स्थिति म आये गिरौदपुरी तीर स्थित ग्राम खोसड़ा के रहइया महेंद्र पैकरा ह बताइस के 28 बछर के वोखर पत्नी ल प्रसव पीड़ा काफी देर ले होवत रहिस जेकर सेती जिला अस्पताल लेके आएन अउ इहां ऑपेरशन के माध्यम ले प्रसव होइस। अस्पताल म दवई अऊ आन सुविधा निःशुल्क मिलीस। ए प्रकार के ऑपेरशन के निजी अस्पताल म अड़बड़ पइसा खर्च होतिस, तेन बांच गे।
मुख्य चिकित्सा अउ स्वास्थ्य अधिकारी बलौदाबाजार डॉ. राजेश कुमार अवस्थी के मुताबिक जिला अस्पताल एन.क्यू.ए.एस. प्रमाण पत्र धारी संस्था हे। ये प्रमाण पत्र उच्च गुणवत्त्तापूर्ण सेवा प्रदान करे के सेती राष्ट्रीय स्तर के मूल्यांकन के बाद मिलथे। अस्पताल म प्रसव के ए सुविधा ल लगातार बेहतर ले अऊ बेहतर करे के प्रयास जारी हे, जेखर से आम जनता ल एकर लाभ प्राप्त हो सकय।