सफलता के कहिनी दुगली वन धन प्रसंस्करण केंद्र ले प्रदेश म पहली पइत एलोवेरा ले तियार होवत हे जेल, बॉडीवाश, शैंपू, जूस जागृति बालिका स्व सहायता समूह के अध्यक्ष नारायणी टेकाम ह मुख्यमंत्री ले चर्चा के बेरा दीन जानकारी

रइपुर 9 अगस्त 2021 सम्मार। विश्व आदिवासी दिवस के बेरा म आयोजित वर्चुअल कार्यक्रम म दुगली वन प्रसंस्करण केंद्र जागृति बालिका समूह के नारायणी टेकाम ह मुख्यमंत्री दाउ भूपेश बघेल ले सोज्झे चर्चा करते बताइन कि प्रदेश म पहिली पइत एलोवेरा ले शैंपू, बॉडीवाश, जेल, जूस के संगे संग मूसली लड्डू अउ वज्रदंती हर्बल पाउडर के उत्पादन बिरगुड़ी नगरी अउ दुगली क्षेत्र म तियार करे जावत हे। बछर 2005—06 ले कमावत उक्त बालिका समूह के दस सदस्य मन ल हरेक दिन 200 रुपिया के आय होथे। समूह कोति ले पीछू साल बछर 2020– 21 म 19 लाख 75 हजार रुपिया के सामग्री तियार करके रायपुर स्थित मार्ट म बेचे गइन हे। एकर ले समूह के सदस्य मन के मनोबल बाढ़े हवय अउ वोमन जादा मेहनत करके अपन आय बढ़ाए अउ आत्मनिर्भता ले सफलता के दिशा म एक एक करके कदम बढ़ाए बर प्रेरित होवत हावय। मुख्यमंत्री दाउ बघेल ह चर्चा के बाद अध्यक्ष नारायणी संग समूह के सदस्य मन ल अउ मन लगाके काम करे बर हौसला अफजाई करीन। जानबा होवय कि कलेक्ट्रेट स्थित सभाकक्ष म धमतरी वन मंडल के तहत स्व सहायता समूह मन कोति ले तियार बने बुनाए हर्बल उत्पाद के प्रदर्शन तको करे गइन। एमे शहद, हवन सामग्री, बेचंदी चिप्स, बहेड़ा चूर्ण, त्रिफला चूर्ण,नीम तेल, कालमेघ चूर्ण, हर्बल धुप,आंवला केंडी,तिखूर पाउडर, मालकांगनी तेल, दोना पत्तल संग एलोवेरा जूस, एलोवेरा तेल, एलोवेरा बॉडीवॉश, साबुन वगैरह शामिल हे। समूह के अध्यक्ष जिहां एक कोति मुख्यमंत्री ले सोज्झे गोठबात करे म हर्ष अउ गर्व महसूस करत रिहिन हे उहेंचे आने सदसय मन तको उछाहित होवत बने मन लगाके बूता करे के बात करीन।