नवा जीवन म प्रवेश करोइया 16 ठ जोड़ी ल दीहिस आसीरबाद
57 लाख रूपिया के कार्य के लोकार्पण अउ भूमि पूजन करिस
पाटन म समाजिक भवन ब 50 लाख रूपिया अउ
गातापार म तलाव के सौंदर्यीकरण के करिस घोसना
दुर्ग, नेहा राठौर के खबर/ मुख्यमंत्री श्री भूपेश बघेल ह आज दुर्ग जिला के पाटन विकासखंड के गांव गातापार म योजित समूहिक आदर्श बिहाव, भक्त माता कर्मा जयंती महोत्सव अउ भामाशाह जयंती कारिकरम म संघरिन। ए मउका म ओ ह नवा जीवन म प्रवेश करोइया 16 ठ जोड़ी ल दीहिस आसीरबाद । मुख्यमंत्री ह पाटन म साहू समाज के समाजिक भवन ह 50 लाख रूपिया अउ गातापार
तलाव के सौंदर्यीकरण के करिस घोसना घलो करिस। साहू समाज कोती ले अयोजित ए कारिकरम म 1007 दीया बार के माँ कर्मा देवी के महाआरती के संग म सांस्कृतिक कारिकरम के प्रस्तुति दीए गईस।
कारिकरम ल संबोधित करत हुए मुख्यमंत्री ह कहिस के राजीम माघी पुन्नी मेला ब राजीम म 55 इकड़ भुइयां आबंटित करे गए हे, जिहां पहुंचे के रद्दा बनाए ले लेके साधु व संत जन मन ब धरमसाला के निर्मान, डोम के निर्मान अउ आने कछु कछु निर्मान कार्य योजनाबद्ध तरीका ले करे जाथ हे।
मुख्यमंत्री ह कारिकरम म 57 लाख के नवा कार्य ले लोकार्पण अउ भूमि पूजन घलो करिस। जेन म गातापार म 25 लाख रूपिया के लागत ले पानी टंकी, 6.50 लाख रूपिया के लागत ले समुदायिक भवन, 3.50 लाख रूपिया के लागत ले सार्वजनिक शौचालय, 3 लाख रूपिया के लागत ले रंगमंच, 2 लाख रूपिया के लागत से कर्मा भवन के जीर्णाेद्धार, उमरपोटी म 2 लाख रूपिया के लागत ले रंगमंच, 10 लाख रूपिया के लागत ले शासकीय उचित मूल्य के दुकान अउ गोदाम संग 5 लाख रूपिया के लागत ले शीतला मंदिर अंगना म जीर्णोंद्धार कार्य के भूमि पूजन हर हावय।
