- छत्तीसगढ़ हॉकी अकादमी रायपुर ल साई ह दीस मान्यता
- राज्य खेल प्रशिक्षण केन्द्र बिलासपुर ल ‘स्टेट सेंटर ऑफ एक्सिलेंस‘ के दर्जा
- मुख्यमंत्री श्री भूपेश बघेल के पहल ले मिलीस सफलता
- खेल सुविधा मन अऊ खिलाड़ी मन के प्रशिक्षण के बड़का कदम
- राज्य सरकार के संगें-संग केन्द्र सरकार ले घलोक ए केन्द्र मन के विकास बर मिलही मदद
- राज्य खेल प्रशिक्षण केन्द्र बिलासपुर ल स्वीमिंग, कुश्ती अऊ एथलेटिक खेल मन बर मिलीस मान्यता
- लोकवाणी के कार्यक्रम म लइका मन के सवाल म मुख्यमंत्री श्री बघेल ह राज्य म लऊहे खेल अकादमी खुलवाए के दे रहिन भरोसा
रायपुर, 16 अक्टूबर 2020। छत्तीसगढ़ राज्य के खिलाड़ी मन के सपना अब साकार होही। मुख्यमंत्री श्री भूपेश बघेल ह गढ़बो नवा छत्तीसगढ़ के परिकल्पना ल खेल के मैदान मन म उतारत राज्य म खेल मन के विकास के नवा अध्याय जोड़े हें। छत्तीसगढ़ राज्य बने के बाद पहली पईत रायपुर म ’आवासीय हॉकी अकादमी’ चालू होवइया हे। एखर संगे संग बहतराई बिलासपुर म ’एक्सिलेंस सेन्टर’ चालू होवइया हे। खेल अऊ युवा कल्याण विभाग ह खेलो इंडिया योजना के तहत रायपुर म आवासीय हॉकी अकादमी (बॉय एंड गर्ल्स) अऊ बिलासपुर म एथलेटिक, कुश्ती अऊ तैराकी बर ’एक्सिलेंस सेन्टर’ के प्रस्ताव भारतीय खेल प्राधिकरण ल प्रेषित करे रहिस, जेकर स्वीकृति मिल गए हे।
‘खेलबो-जीतबो-गढ़बो नवा छत्तीसगढ़‘ के नवा नारा देके ओ मन ल खेल के क्षेत्र म आगू बढ़े बर प्रोत्साहित करे रहिन
जानबा हे के राज्य गठन के बाद छत्तीसगढ़ म खेल अकादमी के स्थापना नइ हो पाय रहिस। मुख्यमंत्री श्री भूपेश बघेल के विशेष पहल म रायपुर म छत्तीसगढ़ हॉकी अकादमी के स्थापना करे गीस, जेमां बालक अऊ बालिका हॉकी खिलाड़ी मन ल प्रशिक्षण बर आवासीय सुविधा उपलब्ध कराए जात हे। राज्य सरकार ह ये अकादमी के भारत सरकार ले मान्यता लेहे बर सरलग उदीम करत रहिस। रायपुर म अंतर्राष्ट्रीय स्तर के दू सर्वसुविधायुक्त हॉकी स्टेडियम पहिलीच बन गे हे। ये सिलसिला म भारतीय खेल प्राधिकरण अऊ खांटी जानकार मन के दल ह रायपुर हॉकी अकादमी के जांच करके उहां के खेल अधोसंरचना अऊ सुविधा मन के जानकारी लेहे रहिन।
